“Kemi boshllëk 1-vjeçar”, Beqaj përjashton Ditmir Bushatin: S’është as në Tiranë as në Shkodër

Ilir Beqaj komentoi nga Shkodra si koordinator i PS në këtë qark edhe pozicionin e Ditmir Bushatit në raport me partinë.

Duke iu përgjigjur interesit të gazetarëve në lidhje me detyrat e Bushatit në Shkodër, Beqaj tha se ai ka 14 muaj që është larguar prej aty.

Më tej, Beqaj tha se Bushati është ende deputet i Partisë Socialiste, ndërsa theksoi se momentalisht ish-ministri i Jashtëm nuk ka detyrë as në Tiranë dhe as në Shkodër.

Edhe pse nuk ja zuri emrin në gojë ish-ministrit të Jashtëm i cili rrjedh edhe nga një familje me emër në Shkodër, Beqja, deklaroi se të paktën për një vit nuk është punuar fare me partinë. Gjithashtu ai paralajmëroi edhe drejtorët e institucioneve, për të cilët tha se pavarësisht se nuk janë `një punë e tij`, do të kalojnë të gjithë në sitë.

‘Kemi një boshllëk një vjeçar në punën e partisë dhe duhet të punojmë shumë. Sigurisht, jam i vetëdijshëm për problemet e partisë dhe drejtorëve. Drejtorët nuk janë një punë e imja, por do të shohim se si kanë punuar sepse kur vjen puna për legalizime ose funksione të tjera nuk ka të majte e të djathtë. Për drejtoritë e zhvendosura nga Shkodra në Lezhë besoj se kjo është një temë e gjatë dhe do të dojë më shumë kohë për të kuptuar konceptin e rajoneve’, deklaroi mes të tjerave ai.

Gjithashtu në fjalën e tij Beqja la për të kuptuar se ka marrë fuqinë nga kryeministri edhe për listën e kandidatëve për deputet që do të nxjerrë PS nga ky qark.

/DRONI.al/

/DRONI.al/