Dritan Abazoviç, president i lëvizjes URA në Malin e Zi që në zgjedhjet e 30 gushtit ka siguruar katër mandate deputetësh, tha se perjashton cdo koalicion me partine e Gjukanovicit. gjatë intervistës së dhënë për “Balkan Talks”, për gazetarin Franko Egro.
Abazoviç e përjashton plotësisht mundësinë e një bashkëpunimi të mundshëm me partinë e Presidentit duke thënë se, ka luftuar gjithmonë kundër tij dhe nuk do t’i shkelë këto parime. Kreu i URA thotë se, forca e tij politike është perëndimore dhe nuk ndryshon qëndrimi për Kosovën.
“Mendoj se nevojitet një qeveri ekspertësh, ku politikanët të punojnë në Parlament. Kryeministër? Mundësi ka por unë mendoj se në këtë qeveri është më mirë me qenë njerëz jashtë politikës”, thotë Abazovic.
“Gjukanoviç në 30 vjet ka ndërtuar një shtet privat dhe çdo gjë ka shkuar në funksion të oligarkëve që kanë qenë afër familjes së tij. Na kanë nën çmuar duke na thënë se nuk e mundim dot, se nuk keni para dhe logjistikë. Por unë gjithmonë e kam besuar dhe kemi ardhur në këtë moment historik. Është hera e parë që në Malin e zi, pushteti ndryshon në mënyrë demokratike”, thotë ai.
“Perëndimi i ka dhënë shumë përkrahje dhe Gedafit, Mubarakut dhe Millosheviçit. Perëndimi të përkrah nëse punon në drejtimin e tyre. Kursi jonë është totalisht proevropian dhe pro perëndimor. Nuk ka asnjë ndryshim në politikën e Jashtme, qëndrimin ndaj NATO apo pavarësisë së Kosovës”, tha ai.
Sipas tij ka ardhur momenti që dhe vendet e tjera në rajon të bëjnë ndryshim në elitat politike, pasi vetëm ato mund të sjellin zhvillim pozitiv
Abazoviç nuk i kursen kritikat për partitë etnike shqiptare në Malin e Zi duke theksuar se i kanë shërbyer pushtetit të Gjukanoniç në një kohë kur ky i fundit ka qeverisur kundër interesave të shqiptarëve. Pavarësisht kësaj ai bën apel që dy deputetët shqiptarë të përfshihen në qeveri.
“Dy deputetët shqiptarë duhet të integrohen në qeverinë e re. Ata deri tani nuk kanë punuar për të mirën e popullit të vet, por kanë punuar vetëm në mbështetje të Gjukanoviç. Në regjistrimin e popullsisë në 2003 shqiptarët kanë qenë 7%, në 2011, 4.9%. Për 20 vjet nëse do të vazhdohej me këtë politikë, nuk do të kishte më shqiptar në Malin e Zi.
Për krijimin e Komunës së Tuzit në 2015, partia e Gjukanoviç ka votuar kundër dhe ne si opozitë kemi votuar pro. Komuna e Ulqinit është e vetmja komunë e varfër bregdetare në vend. Pse nuk kthehen pronat e shqiptarëve? Për çfarë politike flasim në favor të shqiptarëve?”, tha ai.
Kreu i URA nuk bie dakord as me qëndrimin e mbajtur nga Tirana zyrtare në prag të procesit zgjedhor, duke theksuar se kryeministri, Edi Rama i dëmtoi interesat e shqiptarëve.
“Podgorica nga Tirana është vetëm 200 km larg por nuk po mundemi me u kuptu. A është në rregull me dal Edi Rama me përkrah Gjukanoviçin? A mendoni se është normale me përkrah dikën që na ka shti në diskriminim. E kam lexu si në shpullë të madhe partive shqiptare. Për shumicën e liderëve në Ballkan nuk e kam një mendim të mirë, dhe këtu nuk kam për Ramën. Duhet të vijnë njerëz që të fusin një vlerë të re”, përfundon Abazoviç intervisten per Euronews Albania me gazetarin Franko Egro./DRONI.al/
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
