Aida Hajnaj është zyrtarisht drejtuesja e Byrosë Kombëtare të Hetimit. Paraditen e së martës, ish-numri dy i Policisë së Shtetit është prezantuar me drejtuesin e SPAK-ut Arben Krajën. Mësohet se brenda kësaj jave, Hajnaj do të hartojë një rregullore të brendshme për mënyrën e funksionimit të institucionit.
Ndërkohë ditën e sotme, Aida Hajnaj mësohet se ka pasur një prezantim me prokurorët që bëjnë pjesë në Prokurorinë Speciale Antikorrupsion, ku kanë qenë prezent edhe përfaqësues të Ambasadës Amerikane në Tiranë.
Gjithashtu referuar burimeve mësohet se brenda pak ditësh, numri një i BKH-së pritet të çelë edhe garën për 60 oficerë që do të jenë pjesë e kësaj strukture, e quajtur ndryshe si FBI-ja shqiptare.
Të gjithë kandidatët do t’i duhet të plotësojnë disa kritere të forta, siç janë pastërtia e figurës, aftësitë profesionale dhe pasuria. Gjithashtu kandidatët që aspirojnë të bëhen pjese e BKH-së do i nënshtrohen një sërë provimesh, përfshirë edhe testimin e gjendjes fizike dhe testin e poligrafit ose makinës të së vërtetës.
Më pas do të jetë një komision i posaçëm, i përbërë nga dy prokurë të SPAK dhe një gjyqtar i Gjykatës së Posaçme që do të bëjnë përzgjedhjen e tyre. Pjesë e Byrosë mund të bëhen të gjithë ata oficerë të policisë gjyqësore që ushtrojnë detyrën në prokurori, si dhe të gjithë oficerët e policisë që kanë përfunduar akademinë dhe kanë të paktën një vit eksperiencë pune.
/DRONI.al/
