Administrata Trump ka anuluar përpjekjet për të kthyer në vendet e tyre studentët e huaj që vitin e ardhshëm shkollor mund të jenë të detyruar të ndjekin studimet përmes internetit si rezultat i pandemisë.
Të martën administrata anulloi vendimin e një jave më parë.
Gjykatësja federale në Masaçusets, Allison Burroughs tha se ishte arritur një zgjidhje mes autoriteteve amerikane dhe Universitetit Harvard e Institutit të Teknologjisë në Masaçusets, MIT, të cilët kishin ngritur padi kundër administratës Trump lidhur me politikën për dëbimet e studentëve të huaj. Sipas gjykatëses, marrëveshja anulon rregulloren e re dhe kthen status kuonë.
Universitetet ngritën padi me argumentin se rregulloret e reja ishin të paligjshme pasi ndikonin negativisht në institucionet arsimore.
Më shumë se 1 milion studentë të huaj ndjekin studimet në SHBA dhe shumë institucione të arsimit të lartë mbështeten financiarisht në të ardhurat nga këta student, të cilët në shumë raste paguajnë koston e plotë.
Rregullorja e anuluar u argumentuar nga autoritetet si reagim ndaj koronavirusit, që kishte detyruar ndalimin e mësimit në mjedise shkollore. Autoritetet federale thanë se kjo e bënte të nevojshme largimin e studentëve nga SHBA dhe vazhdimin e mësimit në vendet e tyre online.
/ Voa/
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
