EMRI/Arrestohet një person i rrezikshëm në Shkodër, mori peng 2 vëllezër pas prishjes së pazareve të drogës

Blutë e Shkodrës kanë arrestuar ditën e sotme 26-vjeçarin Françesk Vala, i shpallur në kërkim për pengmarrjen e dy vëllezërve, ngjarje e ndodhur në Dukagjin në 21 nëntor të vitit 2015.

Vala është i akuzuar bashkë me 6 persona të tjerë për pengmarrjen e dy vëllzërve S.K dhe A.K.

Ngjarja e asaj kohe erdhi pas prishjes së pazareve të drogës mes autorëve të pengmarrjes dhe dy vëllezërve.

Njëri prej vëllezërve u lirua nga pengmarrësit, ndërkohë që tjetri u mbajt peng për 6 ditë, deri në ndërhyrjen e policisë.

NJOFTIMI I POLICISE

Kapet dhe vihet në pranga një i kërkuar, i dënuar për disa vepra penale.Vihet në pranga edhe një shtetas tjetër, për përkrahje të autorit të krimit.

Në vijim të punës për kapjen e personave të shpallur në kërkim, specialistët e Sektorit Kundër Krimeve të Rënda në Drejtorinë Vendore të Policisë Shkodër, në bashkëpunim me shërbimet e Komisariatit të Policisë Shkodër dhe forcën e posaçme “Shqiponjat”, mbi bazën e informacioneve të marra në rrugë operative, në lagjjen “Rus”, Shkodër, kanë bërë të mundur kapjen dhe ndalimin e shtetasit me rrezikshmëri të lartë shoqërore:

Françesk Vala, 26 vjeç, lindur e banues në fshatin Gjuraj, Njësia Administrative Pult, Bashkia Shkodër.

Gjykata e Apelit për Krimet e Rënda, Tiranë, këtë shtetas e ka deklaruar fajtor dhe e ka dënuar me 8 vjet burg, për kryerjen e veprave penale “Rrëmbimi ose mbajtja peng e personit”, kryer në bashkëpunim dhe “Mbajtja pa leje e armëve luftarake dhe municionit”.

Ky shtetas është autor i ngjarjes së ndodhur në vitin 2015, në fshatin Gjuraj-Plan, Njësia Administrative Pult, Bashkia Shkodër, ku në bashkëpunim me tre shtetas të tjerë, ka rrëmbyer dhe mbajtur peng shtetasin S. K., në këmbim të vlerës 10.000 euro.

Po gjatë operacionit Policia ka arrestuar në flagrancë, për përkrahe të autorit të krimit, edhe shtetasin M. G, 25 vjeç, banues në fshatin Grude e Re, pasi me automjetin e tij po transportonte personin e dënuar me 8 vite burg.Materialet do t’i kalojnë Prokurorisë Shkodër, për veprime të mëtejshme.

/DRONI.al/

/DRONI.al/