71 vjeçari nga Durrësi, që ndërroi jetë një ditë më parë në Sanatorium, është një ish-ushtarak i lartë në Forcën Detare të Shqipërisë. Bëhet fjalë për Çapajev Filen.
Kapitenin i rangut I (në pension) Çapajev File ka shërbyer për rreth 44 vjet në Forcat e Armatosura, kryesisht si pedagog në Akademinë e Detarisë dhe Akademinë e Forcave të Armatosura.
Ai ka shërbyer gjithashtu në detyra të rëndësishme në Forcën Detare, duke filluar nga komandant Katri Silurues në ishullin e Sazanit, shef stërvitje në Bazën Ushtarake të Vlorës, komandant i Grupit të Anijeve Mbiujëse në Bazën e Durrësit, komandant i Shërbimit Hidrografik shqiptar, kapiten i Përgjithshëm i Porteve dhe shef i Shtabit të Forcës Detare.
Ministria e Shëndetësisë e konfirmoi sot vdekjen e tij.
“Në 24 orët e fundit ka ndërruar jetë një pacient 71-vjeçar në spitalin “Shefqet Ndroqi” i cili ishte prej dy javësh i intubuar dhe vuante nga disa sëmundje bashkëshoqëruese si (diabetik, kardiopat, ç’rregullime të ritmit kardiak dhe fibrilacion atrial). Pavarësisht përpjekjeve të mjekëve, 71-vjeçari nuk ka mundur të mbijetojë duke e çuar numrin e qytetarëve që kanë humbur betejën me këtë sëmundje në 27,” bëri të ditur MSH.
71- vjeçari nga Durrësi ishte 1 nga 5 pacientët e parë në Sanatorium kur ky spital u kthye në COVID-2 teksa vuante dhe nga hipertensioni. Më tej Covid-19 i kishte shkaktuar 71- vjeçarit pneumoni bilaterale dhe prej 2 javësh ishte i intubuar. Pneumonia i pamundësoi ekstubimin dhe oksigjenimin duke e çuar në fatalitet.
/DRONI.al/
