Ministrja e Shëndetësisë dhe Mbrojtjes Sociale, Ogerta Manastirliu, lajmëroi sot se është hapur spitali Covid 2. Të gjithë pacientët e tij janë transferuar në spitalin e Elbasanit.
“Kemi hapur edhe spitalin Covid 2, spitalin “Shefqet Ndroqi” i cili ka pritur pacientin e parë. Një rast suksesi i ekipit të kirurgjisë së këtij spitali, me mjekët kirurgë, anestezistë, infermierët dhe i gjithë stafi që kanë kryer me sukses ndërhyrjen kirurgjikale tek një e re e prekur nga COVID-19”, bëri të ditur Manastirliu.
Pacientja e operuar ishte e prekur me COVID-19. Ajo është vajza 18-vjeçare nga Lezha e cila u paraqit në spital me apandesit të gangrenizuar, por pas bërjes së testit rezultoi pozitive me koronavirus.
Operacioni është kryer në Sanatorium mbrëmjen e së premtes nga kirurgu Ylber Vata dhe ekipi i tij.
Reanimatori Arjan Vyshka tha për ABC Neës se pacientja është në gjendje të mirë shëndetësore dhe se Shqipëria ka kushtet e mjaftueshme për të kryer operacione të tilla. Ai tha se vajza ‘qëndronte e vetëkarantinuar në shtëpinë e saj në Lezhë’. I pyetur për familjarët e saj, ai tha: “Nuk e di nëse kanë rezultuar pozitivë ose jo, por në spital vizitat janë të ndaluara, kemi komunikuar përmes telefonit”.
Në spitalin COVID 2, janë organizuar ekipet mjekësore që do të shërbejnë në këtë spital, ndërsa në spitalin infektiv po vijon trajtimi i pacientëve me covid-19.
Ministrja e Shëndetësisë tha se kjo situatë do të kalohet duke respektuar të gjithë Paktin e Madh për Shëndetin.
“Ne do të vazhdojmë t’ju shërbejmë me përkushtimin dhe sakrificën e mjekëve, infermierëve, epidemiologëve tanë të mrekullueshëm. Ne do të vazhdojmë t’ju mbajmë të informuar me korrektësi dhe transparencë maksimale çdo ditë, çdo orë, për çdo zhvillim. Ndërsa JU, ju do të vazhdoni të zbatoni rigorozisht masat e higjenës dhe të distancimit social, si i vetmi mjet për të ndërmuar njëri-tjetrin në kët betejë të përbashkë”, tha Manastirliu
Në Shqipëri janë 212 raste të konfirmuara pozitivë me COVID-19 deri sot dhe janë kryer 1436 teste në Laboratorin e Virologjisë në Institutin e Shëndetit Publik.
