Shefja e Departamentit të Sëmundjeve Infektive në ISHP, Silva Bino, konfirmoi sot se Shqipëria nuk ka asnjë rast të dyshuar apo të konfirmuar me koronavirus në Shqipëri.
Në një dalje për mediat, ajo vuri theksin te kujdesi higjenosanitar nga qytetarët.
Bino: Me rëndësi është të jemi vigjilentë dhe të kujdesshëm për veten dhe të afërmit tanë. Këto janë rregullat kryesore të higjenës. Ky virus nuk luftohet vetëm nga strukturat qeveritare por edhe duke u përkujdesur për veten dhe të afërmit tanë.
“Mos të përshtyjmë dhe lëshojmë qyrrat tona anembanë” porositi ajo.
Bino tha se koronavirusi përhapet njësoj si virusi i gripit, me spërkla, por ka një vdekshmëri më të lartë se virusi i gripit.
Por si ta dallojmë nga gripi?
Bino: Simpomat janë të ngjashme me gripin, me rëndësi është historia e udhëtimeve. Nuk duhen neglizhuar shenjat, të kontaktojnë menjëherë 127. Simptomat kryesore lidhen me problemet e frymëmarrjes. Por nuk duhet të dyndeni nëpër urgjenca. Kontaktoni në telefon me mjekun e familjes, te 127.
Instituti i Shëndetit Publik, shtoi ajo, e përcakton koronavirusin në vend.
Bino: Ka disa pajisje jo një, ka të gjitha kitet dhe ragentët për të diagnostikuar koronavirusin në vend.
Bino tha se janë përforcuar masat në kufi.
Bino: U bëj thirrje qytetarëve që udhëtojnë nga Italia apo Kina, të jenë të kujdesshëm dhe të raportojnë çdo shqetësim mjekësor.
Mjekja e infektivit nënvizoi se virusi në asnjë vend të botës nuk mund të ndalet në aeroport.
Në lidhje me karantinën, ajo tha se karantina është vend për të shëndoshët.
Bino: Kemi përcaktuar rregullat si do bëhet vetëkarantinimi në shtëpi dhe karantina e posaçme në strukturat shëndetësore.
