Kryetari i Gjykatës Administrative të Vlorës, Astrit Shema u shkarkua nga detyra të premten për pasuri të pajustifikuar. Vendimi u shpall nga trupa gjyqësore e drejtuar nga Suela Zhegu, me relatore Etleda Çiftja dhe anëtare Xhensila Pine.
Në seancën dëgjimore para KPK-së, Shema u përball me akuza për deklarime kontradiktore dhe fshehje të llogarive të pagës së të birit dhe bashkëshortes. Analiza financiare e nxorri gjyqtarin Shema me mungesë burimesh prej 5.2 milionë lekësh.
Shema i kundërshtoi gjetjet e KPK. Ai tha se kishte bërë një ekspertizë të vetën financiare dhe se Komisioni nuk kishte marrë parasysh pagat e tij dhe të bashkëshortes. Ai po ashtu kundërshtoi llogaritë e shpenzimeve edhe pse iu vu në dukje nga relatorja se ato ishin marrë siç ishin deklaruar prej tij në pyetësor. Shema tha se një nga personat e cilësuar të lidhur me të cilin ai nuk kishte kontakte i kishte kthyer përgjigje përmes një të treti se “Nuk i interesonte nëse e shkarkonin nga puna” dhe se nuk do i përgjigjej pyetjeve të Komisionit.
Shema ka filluar punë në sistemin e drejtësisë që prej mesit të viteve 90’, si gjyqtar e drejtues Gjykate në Përmet dhe më pas në Gjirokastër e prej vitit 2013 si Kryetar i Gjykatës Administrative të Vlorës.
Ai u hetua vetëm për kriterin e pasurisë, ndërsa kërkesat e tij për të rihapur hetimet për dy kriteret e tjera u rrëzuan nga Komisioni i Pavarur i Kualifikimit.
Vladimir Karaj
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
