Kryeministri i Kosovës, Albin Kurti ka paralajmëruar zëvendësimin e taksës 100 për qind të vendosur nga qeveria e kaluar për importet nga Serbia dhe Bosnje e Hercegovina, me reciprocitetin e plotë politik, ekonomik e tregtar.
Në konferencën e tij të parë për shtyp si kryeministër, pas takimit me shefen e Zyrës së BE-së në Kosovë, Nataliya Apostolova, Kurti tha se marrëdhëniet me Serbinë do të avancojnë, por me reciprocitet të plotë.
“Ne nuk i vendosim Serbinë dhe Bosnjën në të njëjtën fjali asnjëherë. Edhe për shkaqe historike dhe për arsye aktuale. Ne konsiderojmë se jemi këtu ku jemi, ku si qeveri e re edhe për shkak të zotimit tonë se me Serbinë do të kemi reciprocitet, politik, ekonomik dhe tregtar si zëvendësim për tarifën 100 përqind”.
Të njëjtin qëndrim ka shpalosur më herët edhe Vjosa Osmani, kryetarja e re e kuvendit të Kosovës.
“Ne besojmë që tarifa duhet të zëvendësohet me masë të reciprocitetit në raport me Serbinë”.
Ndërkaq, Shefja e Zyrës së Bashkimit Evropian në Kosovë, Nataliya Apostolova tha se pret nga qeveria e Kurtit të dalë me ide të reja, në mënyrë që të rinisë dialogu ndërmjet Kosovës dhe Serbisë.
“Presim që qeveria e re të dalë me propozime dhe ide të reja se si do të trajtojë këtë çështje. Nuk dëshirojmë të parashikojmë se cila do të jetë zgjidhja vetëm dëshirojmë që këto bisedime të vazhdojnë”.
Pozicioni që Qeveria e re e Kosovës do të marrë në raport me taksën 100 për qind ndaj importeve nga Serbia dhe Bosnje e Hercegovina, pritet të jetë hap vendimtar në lidhje me vazhdimin e dialogut ndërmjet Prishtinës dhe Beogradit. Një ditë më parë edhe i dërguari i Shtëpisë së Bardhë për dialogun Kosovë-Serbi, Richard Grenell, i bëri thirrje Qeverisë së re të Kosovës që të heqë taksën ndaj mallrave të importuara nga Serbia. Ndërkohë, një tjetër vendim i rëndësishëm i bërë publik sot nga kryeministri Kurti është edhe ai sipas të cilit, qeveria e tij do të rishikojë të gjitha vendimet e qeverisë Haradinaj që nga dorëheqja e këtij të fundit në korrik të vitit të kaluar.
“Të gjitha vendimet që janë marrë pas datës 19 korrik 2019, nuk mund të ketë statusin e njëjtë si vendimet pas kësaj date. Pra, po i referohem datës kur ish kryeministri dha dorëheqje. Prandaj, Qeveria e Republikës së Kosovës, unë si kryeministër i saj do të kemi një rishqyrtim të gjithë kësaj fazës pas dorëheqjes së ish kryeministrit”. Top Channel
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
