Në Iran kanë nisur arrestimet për rrëzimin e avionit ukrainas që i mori jetën 176 personave. Gjyqësori në Teheran ka njoftuar për arrestimet, por më shumë detaje nuk bëhen me dije. Ndërkohë, mediat ndërkombëtare raportojnë për rreth 30 ushtarakë të arrestuar.
Irani pranoi se ushtria e tij kishte goditur gabimisht aeroplanin ukrainas në fillim të kësaj jave në periferi të Teheranit, duke vrarë të 176 personat në bord.
Rrëzimi i aeroplanit Boeing 737 të linjës ajrore ndërkombëtare të Ukrainës, ndodhi vetëm disa orë pasi Irani kishte nisur një sulm me raketa balistike ndaj bazave irakiane në të cilat janë dislokuar ushtarë amerikanë. Sulmi iranian ishte përgjigje ndaj sulmit amerikan që vrau komandantin e forcave iraniane Quds, Qassem Soleimani.
Prej ditës së parë të incidentit e deri të premten Irani e pati mohuar se ishte përgjegjës për rrëzimin e avionit, pavarësisht pohimeve të zyrtarëve amerikane e kanadeze të cilët ishin shprehur të bindur, bazuar në prova të shërbimeve të zbulimit, se një raketë iraniane ishte bërë shkak për rrëzimin e avionin ukrainas.
Aeroplani po udhëtonte drejt kryeqytetit ukrainas Kiev, një ndalesë për shumë iraniano-kanadezë e studentë iranianë që kryejnë studimet në Kanada. Në mesin e pasagjerëve të vrarë 57 ishin shtetas kanadezë.
/DRONI.al/
