Këshilli i Lartë i Prokurorisë njoftoi dje se në mbledhjen e së hënës, 25 nëntor, do të emërohen 8 prokurorët e Prokurorisë së Posaçme Antikorrupsion.
“Do bëhet miratimi i projektakteve për emërimin e 8 (tetë) prokurorëve në Prokurorinë e Posaçme: Altin Dumani, Arben Kraja, Behar Dibra, Edvin Kondilli, Elida Celami (Kaçkini), Ened Nakuçi, Enkeleda Millonai dhe Klodian Braho. Shpallja e garës për pozicionin e drejtuesit të Prokurorisë së Posaçme. Miratimin e metodologjisë për vlerësimin e kandidatëve për drejtues të Prokurorisë së Posaçme”, njoftoi KLP-ja.
Ndërkohë, pak me vone, Ambasada Amerikane nepermjet një postimi në rrjetet sociale, bëri të ditur se ka dhuruar 5 paketa të kontrollit poligraf, ose siç njihen ndryshe si makinat e së vërtetës.
Këto paketa do të përdoren për testimin e kandidatëve për Byronë Kombëtare të Hetimit, institucion me rëndësi të veçantë në hetime dhe që do të jetë në varësi të Strukturës së Posaçme Antikorrupsion. Me emërimin e prokurorëve, KLP-ja bën të ditur se do të hapë edhe garën për drejtues të kësaj Prokurorie.
Struktura e Posaçme Antikorrupsion është struktura e posaçme, që do të hetojë dhe çojë në gjykatë dosjet e korrupsionit dhe krimit të organizuar.
//DRONI.al/
