KLP ka konfirmuar kandidatët zyrtarë për postin e kryeprokurorit. Nga gara, KLP s’kualifikoi kandidatin, Lulzim Alushaj ndërsa konfirmoi tre kandidatët e tjerë Arta Markun, Olsian Çelën e Fatjona Memçajn.
Këshilli i Lartë i Prokurorisë vendosi që Alushaj nuk plotësonte kriteret ligjore për kandidim.
Kandidati Alushaj, nga rradhët e avokatisë, ka të drejtën të ankimojë vendimin e KLP brenda 5 ditëve në Gjykatën Administrative të Apelit.
Ndërsa kjo e fundit duhet të japë vendimin brenda 7 ditëve pas ankimimit të kandidatit për kryeprokuror.
Në nisjen e mbledhjes, rreth orës 11:00, kreu i KLP, Gent Ibrahimi tha se: “KLP do vlerësojë kandidatët që plotësojnë kushtet ligjore për të vazhduar garën për Prokuror të Përgjithshëm. Kandidati që s’kualifikohet sot mund të ankimojë në Gjykatën Administrative të Apelit për 5 ditë. Gjykata Administrative ka të drejtën të marrë vendimin për kandidatin brenda 7 ditëve të tjera.”
Në garë ishin:
Arta Marku – Prokurore e Përgjithshme e Përkohshme
Olsian Çela – Prokuror në Prokurorinë e Krimeve të Rënda
Fatjona Memçaj – Prokurore në prokurorinë e Apelit
Lulzim Alushaj – Nga radhët e avokatisë
