Presidenti Meta u nis me urgjencë drejt Durrësit për të monitoruar nga pranë gjendjen e krijuar nga tërmetet të cilat shkaktuan dëme materiale dhe të lënduar.
Nga spitali i Durrësit, ku shoqërohej nga prefekti Roland Nasto deklaroi se ka marrë informacionin e plotë nga prefekti dhe përfaqësuesi i Shtabit të Emergjencave. Për mediat, presidenti shtoi se ka vendosur në dijeni dhe vendet fqinje për asistim në çdo rast të papritur. Në fund, Meta bëri apel për ta përballuar situatën me qetësi.
“Të evidentojmë pasojat e tronditjeve të deritanishme. Jemi në një vigjilencë të vazhdueshme, është e rëndësishme që të jemi në kontakt edhe me vendet fqinje që të jemi të përgatitur për çdo situatë. Unë besoj se tani është koha për të qënë të vëmëndshëm dhe të punojmë të koordinuar. Të bashkëpunojmë ngushtë me strukturat, mediat, të evitojmë pasojat e deritanishme dhe njëkohësisht për të ndjekur situatën me qetësi dhe durim maksimal’’, përfundoi kreu i shtetit.
