Vendimi për ish-ministrin Tahiri, nuk i kalon as 2 faqe A4 të plota. Në media po qarkullojnë fletet e vendimit, të cilat tregojnë se 11 orët e pritjes paskan qënë për dy fletë të thjeshta.
Pas një seance maratonë, Gjykata e Krimeve të Rënda gjeti fajtor ish-ministrin e brendshëm Saimir Tahirin vetëm për një nga tre akuzat e ngritura nga organi i akuzës.
Prokuroria kërkoi javën e shkuar dënimin prej 12 vitesh burgim, duke e akuzuar ish ministrin për të paktën tre vepra të rënda: Trafik i narkotikëve kryer në bashkëpunim në formën e grupit të struktuar kriminal; Pjesmarrje në grup të strukturuar kriminal dhe Kryerja e veprës në grup të strukturuar kriminal.
Kujtojmë se Gjykata e Krimeve të Rënda e dënoi me 3.4 vite burg ish-ministrin e Brendshëm por këto i kthehen në 3 vite shërbim prove.
Vendimi i plotë i Gjykatës së Krimeve të Rënda për të pandehurin Saimir Tahiri
Vendosi:
Deklarimin fajtor të të pandehurit Saimir Tahiri për veprën penale të “Shpërdorimit të detyrës”, të parashikuar nga neni 248 i K. Penal, dhe dënimin e tij me 5 (pesë) vjet burgim.
Deklarimin i pafajshëm të të pandehurit Saimir Tahiri për veprën penale të “Grupit të strukturuar kriminal” të parashikuar nga neni 333/a paragrafi i dytë të K. Penal, pasi nuk provohet që i pandehuri e ka kryer veprën penale që akuzohet, bazuar në nenin 288, pika 1, gërma “d”, të K.Pr. Penale.
Në bazë të nenit 406 pargrafi i parë të K. Pr. Penale, të pandehurit Saimir Tahiri, për shkak të gjykimit të shkuruar, i ulet një e treta e dënimit me burgim dhe dënohet përfundimisht me 3 (tre) vjet e 4 (katër) muaj burgim.
Bazuar në nenin 59 të K. Penal, urdhërohet pezullimi i vuajtjes së dënimit me burgim për të pandehurin Saimir Tahiri dhe vënien e tij në provë për një afat prej 3 (tre) vjet, me kusht që gjatë kësaj kohe të mos kryejë vepër tjetër penale, duke urdhëruar që i pandehuri të mbajë kontakte me shërbimin e provës.
