Presidenti Ilir Meta është bërë pjesë e seancës së dhurimit të gjakut, të organizuar sot nga të rinjtë e “Fundjavë Ndryshe”. Meta ka falënderuar këtë fondacion bamirës, që sipas Kreut të Shtetit, jep kontribut të madh për të lehtësuar sado pak dhimbjen e mijëra qytetarëve.
Duke kujtuar edhe njëherë Ditën e Shenjtërimit të Nënë Terezës, Meta shkruan në “Facebook” se nuk duhet harruar mjerimi, varfëria dhe vuajtjet e njerëzve, që sipas tij, janë shpesh një kërcënim për paqen.
Dita Ndërkombëtare e Bamirësisë dhe Dita e Shenjtërimit të Nënë Terezës, të lidhura fort me njëra-tjetrën në mesazhin njerëzor e të rëndësishëm që përcjellin, humanizmit e solidaritetit ndaj njerëzve në nevojë, më bashkuan me dhjetra të rinj e të reja të “Fundjavë Ndryshe” që me vullnetarizëm organizuan sot një seancë dhurimi gjaku.
Duke e falenderuar këtë Fondacion bamirës, edhe për kontributin e madh të dhënë për lehtësimin sado pak të dhimbjes dhe varfërisë së mijra qytetarëve, jam besimplotë se kjo fushatë ndërgjegjësimi për kauzën humane të dhurimit të gjakut nuk do të ndalet deri në përmbushjen e qëllimit të saj qytetar dhe fisnik.
Sikurse ka qenë edhe motivacioni në dhënien e Çmimit Nobel për Shën Nënë Terezën, nuk duhet të harrojmë se mjerimi, varfëria dhe vuajtjet janë shpesh një kërcënim për paqen. Vetëm përmes një angazhimi të vazhdueshëm dhe të qëndrueshëm, për të mbyllur këto plagë sociale, ne jo vetëm do dhurojmë shumë dashuri e shpresë, por njëkohësisht do forcojmë paqen dhe begatinë në komunitetet, familjet dhe në Shqipërinë tonë.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
