PD: Rama prej 10 ditësh nuk ka thënë asnjë fjalë për “mollën e kalbur”…

Partia demokratike ka vijuar akuzat ndaj kryebashkiakut të Vorës, Agim Kajmaku, në vazhdën e publikimit të “dokumentit autentik” të Gjykatës së Janinës sipas të cilës kandidati i Partisë Socialiste dalë nga zgjedhjet vendore monopartiake të 30 qershorit, është arrestuar në territorin grek në vitin 2003 për veprën penale “për përdorim dhe shpërndarje kartëmonedhash të falsfikuara”, për të cilën parashikohen më së paku 10 vjet burg.

Në një dalje për mediat, ish-deputeti Ervin Salianji ka deklaruar se “Edi Rama mbyll sytë para provave të pakundërshtueshme të inkriminimit të Agim Kajmakut duke e mbrojtur me kodin mafioz të heshtjes”.

“Me gjithë këto prova të pakundërshtueshme, Kajmaku i Rilindjes fshihet pas rreshtave të mashtrimit të Edi Ramës, i cili me kodin mafioz të heshtjes, mbron të inkriminuarin me të cilin është ulur në sofrën e pushtetit.

Edi Rama prej 10 ditësh nuk ka thënë asnjë fjalë për mollën e kalbur nxjerrë nga shporta e krimit që mban në dorë.” tha Salianji.
Më tej, ish-deputeti akuzoi Prokurorinë se i kërkon llogari Partisë Demokratike për Kajmakun, në vend që të shohë provat në sistemin TIMS.

“Të dhënat e sistemit TIMS rrëzuan çdo alibi apo përpjekje të Ramës për të gënjyer, duke provuar se Agim Kajmaku është personi i arrestuar në Greqi si Jorgo Toto nën akuzën e trafikimit të parave të falsifikuara. Prokuroria hesht dhe në vend të fletës së arrestit për Kajmakun, nis letra për Partinë Demokratike duke i kërkuar provat që i ka në sistemin TIMS.

Prokuroria nuk zbaton kodin penal dhe ligjin e dekriminalizimit për të vënë para drejtësisë të kërkuarin në Greqi, i cili ka trafikuar para të falsifikuara dhe mashtruar në formularin e dekriminalizimit”.- tha ndër të tjera Salianji nga selia blu.
Më herët, PD-ja ka publikuar dokumentet nga sistemi TIMS që vërtetojnë sipas saj se Agim Kajmaku dhe Jorto Toto janë i njëjti person, i arrestuar në territorin grek.

/DRONI.al/