Policia ka njoftuar zbardhjen e ngjarjes së 18 gushtit ku Kreshnik Braho, djali i deputetit socialist Spartak Braho është kërcënuar me armë zjarri pranë banesës së tij.
Këtë denoncim kujtojmë që e bëri ish kryeministri Berisha. Sipas tij, policia është urdhëruar që ta fshehë ngjarjen. Burime për Shqiptarja.com, bëjnë me dije se Braho është kërcënuar nga shtetasi Lajden Kadilli, i cili tashmë është shpallur në kërkim nga policia.
Kjo media deklaron se Braho ka qenë poshtë shtëpisë së tij në praninë e dy fëmijëve të mitur, kur është sulmuar me armë nga Kadilli. Ky debat mësohet se ka lindur për parkimin poshtë banesës ku jeton Braho.
Debati mes Kadillit dhe Brahos ka nisur për një vend parkimi. Ky i fundit i ka kerkuar Kadillit që ta largojë makinën nga vendi ku e kishte parkuar.
Më pas situata është agravuar midis palëve duke sjellë nervozizmin e Kadillit që ka shkuar në banesën e tij ku është kthyer në vendin e debatit me një armë zjarri.
Braho i trembur nga arma, është larguar me shpejtësi duke bërë denoncim në policinë e Durrësit.
Por ajo që bëri përshtypje ishte mos berja publike e kësaj ngjarjeje nga Policia. Lajden Kadilli mësohet se është person me precedentë të shumë penalë.
Ai mësohet të jetë i dënuar me kusht për akuzën e “Plagosjes së lehtë me armë” dhe ishte caktuar nga gjykata e Kavajës, për të mbajtur kontakte me shërbimin e provës në Durrës.
Ndërkohë prokuroria e Kavajës e ka akuzuar për “Plagosje të rëndë me dashje” dhe “Mbajtje pa leje të armëve luftarake”, duke kërkuar 6 vite burgim.
