Në sezonin e verës gjithmonë janë të pranishme zënkat, konfliktet dhe sherret masive, të cilat kryesisht ndodhin në zonat që frekuentohen nga të rinjtë. Kjo situatë u përsërit nga disa të rinj të cilët në orët e para të mëngjesit të së dielës u perfshine në sherr në një lokal nate në plazhin e Jalës.
Ngjarja ndodhi rreth orës 2:30-03.00 të mëngjesit në ambientet e një lokali VIP në Jalë, ku dy grupe të rinjsh të cilët nuk ishin banorë të zonës u përfshinë në konflikt pasi kishin konsumuar alkool.
Fillimisht u tha se ish-banorja e Big Brother, Françeska Jaçe ishte molla e sherrit, por ajo ka reaguar personalisht për të sqaruar zërat.
E kontaktuar nga “Shqiptarja.com”, Jaçe ka mohuar një lajm të tillë dhe është shprehur se aktualisht ndodhet me pushime në jug, por në Dhërmi e jo në Jalë.
“Unë jam në Dhërmi, prej disa ditësh. Nuk kam aspak lidhje me këtë ngjarje”, iu përgjigj Jaçe.
Në videon e mëposhtme të publikuar nga JOQ dëgjohen britma dhe njerëz teksa largohen me shpejtësi nga ambienti i lokalit, e ndërsa në shkallë shihen njolla gjaku.
