FOTO/Shkrumbohet anija turistike në Karaburun, policia detaje: Si i shpëtuan 5 marinarët zjarrit të madh

Policia e Vlorës ka dhënë detaje mbi ngjarjen e rëndë të ndodhur mëngjesin e sotëm në Karaburun.

Policia sqaron se anija “Aqua Marine” është përfshirë nga fjalët, ndërsa Policia Kufitare ka arritur të shpëtojë 5 shtetasit, që iu rrezikohej jeta nga zjarri, teksa ndodheshin në mjetin lundrues.

Njoftimi i policisë:

Mjeti lundrues i “Aqua Marine” duke qenë se punon me turistët nga Moli i Vlorës drejt Karaburunit, për shkak të luhatjeve të kohës, është shkëputur nga Moli i Vlorës në fundjavë dhe është ankoruar në Karaburun, me qëllim që të ishte e përgatitur për vozitjen e turistëve atje.

Në orët e para të mëngjesit në Karaburun pranë plazhit të Shën Vasilit, në këtë mjet lundrues ka rënë zjarr duke u rrezikuar jeta e disa shtetasve. Pas njoftimit të marrë, Policia Kufitare me mjetet e saj lundruese, nën drejtimin orientues të QNOD Durrës, shkoi në ndihmë të personave që kërkuan ndihmë, duke bërë të mundur konstatimin e mjetit lundrues pranë gjirit të Dhimokushtës dhe shpëtimin e sigurt të personave në bordin e saj.

Në këtë mjet lundrues ndodheshin 5 persona, të cilët nuk kanë probleme dhe janë në gjendje të mirë shëndetësore. Si pasojë e flakëve, mjeti lundrues është djegur pothuajse plotësisht. Grupi hetimor po kryen veprimet e mëtejshme në lidhje me sqarimin e rrethanave dhe zbulimin e shkaqeve të rënies së zjarrit.

/DRONI.al/