Edhe Kosova në mbështetje të Teatrit Kombëtar: Anuloni vendimin për rrënimin e këtij objekti

Në një njoftim zyrtar, Shoqata Sindikale e Teatrit Kombetar te Kosoves, ka shprehur mbështetjen për Teatrin  Kombëetar, ndaj të cilit është planifikuar shembja dhe ngritja e disa kullave.

Në njoftimin e tyre ata i kërkojnë institucioneve vendimarrese të shtetit shqiptar, që urgjentisht të anulojnë vendimin për rrënimin e këtij objekti dhe të fillojnë procedurat për restaurimin dhe rifunksionalizimin e tij.

REAGIMI I PLOTE

Të mbrohet tempulli i Teatrit Kombëtar të Shqipërisë.

Shoqata Sindikale e Teatrit Kombëtar të Kosovës, së bashku me shumë artistë dhe qytetarë nga Kosova, po i përcjellë me shqetësim zhvillimet e fundit rreth tentimit për rrenimin e objektit të Teatrit Kombëtar të Shqipërisë dhe shprehë mbështetjen dhe solidaritetin e plotë me artistët që janë vënë në mbrojtje të kësaj vlere shpirtërore, kulturore dhe historike.

Shoqata Sindikale e Teatrit Kombëtar të Kosovës e konsideron të papranueshme sjelljen e dhunshme të policisë ndaj aktorëve protestues dhe paqësor, si rasti i dhunës ndaj aktorit dhe regjisorit Edmond Budina, i cili është një ikonë e padiskutueshme e teatrit dhe kinematografisë shqipëtare.

Institucionet e shtetit shqipëtar duhet ta kenë parasysh, se lotet e derdhur të artistëve në mbrojtje të objektit të Teatrit Kombëtar, janë një mallkim për këdo qoftë që i shkakton ata, se kur thyhet shpirti i artistit, është thyer shpirti i një kombi.
Shoqata Sindikale e Teatrit Kombëtar të Kosovës vë në dukje, se në asnjë vend demokratik nuk rrënohen objektet që paraqesin pasuri historike dhe kulturore, por këto objekte mirëmbahen, restaurohen dhe rifunksionalizohen, prandaj ç’do tëndencë për rrënimin e objekteve të tilla përfshirë dhe Teatrin Kombëtar është sulm mbi historinë, kulturën dhe shkëputje e dhunshme nga vlerat e të kaluares.

Shoqata Sindikale e Teatrit Kombëtar të Kosovës kërkon nga institucionet vendimarrese të shtetit shqipëtar, që urgjentisht të anulojnë vendimin për rrënimin e këtij objekti dhe të fillojnë procedurat për restaurimin dhe rifunksionalizimin e tij për arësye se e ardhmja e ndritshme e një institucioni dhe vendi nuk ndertohet mbi rrënojat e të kaluares, por mbi themelet e sigurta të saj.

SHSTKK:

/DRONI.al/