Zaganjori për deklarimet e pasurisë: Kam paraqitur 10 dokumente të reja, ndonjëherë kalohen caqet e mundshme

Pranë Kolegjit të Posaçëm të Apelimit, po mbahet sot seanca për kreun e Gjykatës së Lartë, Xhezair Zaganjorin.
Sipas Komisioneri Publik Florian Ballhysa “nuk rezulton të ketë ndryshuar asnjë rrethanë” sa i përket shkaqeve të ankimit të tij ndaj konfirmimit të Zaganjorit në detyrë nga Komisioni i Pavarur i Kualifikimit.

Lexo edhe: Kreu i Gjykatës së Lartë në KPA, Komisioneri Publik: Të shkarkohet

Komisioneri vlerëson se “ të gjitha shkaqet e ankimit duhet të merren në shqyrtim”, pasi sipas tij ka pasaktësi në vlerën e pasurive dhe burimin e të ardhurave për krijimin e tyre, dhe 23 provat shtesë të paraqitura nga Zaganjori, ndër të tjera një deklaratë noteriale e 4 bashkëpronarëve dhe bashkëshorteve të tyre ku deklarohet fakti se 4 çiftet kanë kontribuar në ndërtimin e një godine me 5 kate, “nuk përbëjnë ndonjë vlerë të shtuar, pasi subjekti nuk ka arritur të dokumentojë vlerën e ndërtimit të godinës, ode vlerat e përfituara nga qiraja me British Council dhe pagimet e taksave”.

Ballhysa shtoi se Zaganjori nuk arrin ndërkohë të justifikojë “me burime të ligjshme kursimet dhe shpenzimet e kryera për shkollimin e të birit në Gjermani”.
Ndërkohë, Zaganjori deklaroi se ka paguar çdo detyrim tatimor, duke paraqitura 10 prova shtesë. “Unë dhe bashkëpronarët edhe në vite të vështira 1997-98-99 kemi paguar çdo detyrim tatimor”, replikoi kreu i Gjykatës së Lartë.

Në dalje Zaganjori u shpreh për mediat duke thënë se “edhe sot rreth të njëjtave argumente vërtiten pyetjet dhe përgjigjet. Kam paraqitur 10 dokumente të reja, trupi gjykues është tërhequr për t’i shqyrtuar. Unë përpiqem të bëj më të mirën për të gjetur këto dokumente, sigurisht që ndonjëherë kalojnë edhe caqet e mundshme për të gjetur atë që kërkohet, por brenda mundësive unë përpiqem. Se sa do të merren parasysh, kjo varet nga vlerësimi i Kolegjit të Apelimit”.

Zaganjori komentoi edhe emërimin e 4 anëtarëve të rinj Gjykatës së Lartë, ku cilësoi faktin qenë këtë mënyrë institucioni që kryeson “marr disi fryme”, sepse shumë nga çështjet më urgjente, veçanërisht në rrafshin civil, mund të gjykohen me tre gjyqtarë.

/DRONI.al/