Situatës kaotike me zgjedhjet, ngërçit mes partive politike dhe kokëfortësive të socialistëve, i shtohet dhe një tjetër element interesant.
Këshilli i Europës së fundmi ka vendosur të anulojë misionin e tij vëzhgues për zgjedhjet e 30 qershorit “për shkak të pasigurisë lidhur me organizimin e tyre dhe rrezikut të mundshëm të vendosjes në zona të ndryshme”.
Informacioni bëhet me dije përmes një e-maili dërguar zyrës së Këshillit të Europës në Tiranë. Nga ky Email ata kanë konfirmuar mos praninë e tyre në Shqipëri për zgjedhjet vendore.
Kujtojmë këtu se Këshilli i Europës është një organizatë ndërkombëtare e cila ka si synim ruajtjen e të drejtave të njeriut, demokracisë dhe sundimit të ligjit në Europë, çka e bën atë një prej institucioneve më të rëndësishme.
“Drejtuesit e Kongresit të Autoriteteve Lokale dhe Rajonale të Këshillit të Europës ka vendosur që të mos dërgojë në Shqipëri një Delegacion për Vëzhgimin e Zgjedhjeve për shkak të pasigurive të vazhdueshme në lidhje me organizimin e zgjedhjeve vendore në Shqipëri më 30 qershor dhe rreziqeve të mundshme për sigurinë në zona të ndryshme”,-thuhet në njoftimin e Këshillit të Evropës.
