Bashkia e Kamzës është e vendosur për të zbatuar dekretin e Presidentit Meta, duke mos u pajtuar me vendimin për të mbajtur zgjedhjet në 30 Qershor.
Kryetari i Bashkisë, Xhelal Mziu, në dokumentin drejtuar të gjithë institucioneve përgjegjëse për zgjedhjet, deklaron se nga ana e institucionit të Bashkisë Kamëz dhe e tij personalisht është ndjekur e gjithë procedura ligjore për zbatimin e Dekretit të Presidentit të Republikës së Shqipërisë. Duke vlerësuar kushtetushmërinë e këtij dekreti, ai deklaroi se nuk do të ketë zgjedhje më 30 qershor 2019.
“Komisioni Qendror Zgjedhor nuk ka tagër ligjor që të gjykojë mbi Dekretet e Presidentit për sa i përket datës së zgjedhjeve. Nëse Komisioni Qendror i Zgjedhjeve ka rezervat e tij ligjore për Dekretet e Presidentit, mund t’i drejtohet vetë kryesisht këtij institucioni (Presidentit)”,-thuhet në dokument.
