30 Qershori në duart e Kolegjit Zgjedhor, Manjani: Nuk mund të shqyrtojë ankesa jashtë proçesit zgjedhor

Të hënën, Kolegji Zgjedhor do të marrë një vendim lidhur me Padinë e Partisë Uniteti Kombëtar, prej nga do të përcaktohet nëse do të zhvillohen ose jo zgjedhjet lokale.

Trupa gjykuese me relator Skrelin, pritet të shqyrtojë në fillimjavë padinë e Idajet Beqirit, në koalicion me socialistët i cili kërkon shfuqizimin e vendimit të Komisionit Qendror të Zgjedhjeve që refuzoi ta çregjistronte Partinë Uniteti Kombëtar të drejtuar nga avokati, nga zgjedhjet e pushtetit vendor.

Kjo do të përcaktojë dhe nëse dekreti i presidentit Meta do të zbatohet dhe do të merret parasysh, duke rrëzuar datën 30 Qershor përfundimisht. Në një sqarim që Ylli Manjani i bën kësaj situate, ligjërisht ai thotë se Kolegji Zgjedhor nuk mund të shqyrtojë ankesa të subjekteve politike jashtë proçesit zgjedhor.

“Formalisht pas Dekretit të Presidentit ne nuk jemi në proçes zgjedhor. Ndaj debati ka apo jo të drejtë një subjekt të largohet apo të rrijë në zgjedhje nuk ekziston përsa kohë që ska zgjedhje. Në të shkuarën janë shqyrtuar kërkesa të tilla, por gjithnjë brenda një proçesi apo periudhe zgjedhore”,-sqaron ai.

Manjani shton  se fuqinë e këtij dekreti e anulon ose vetë Presidenti ose Gjykata Kushtetuese.

“Përsa kohë dekreti është në fuqi, Kolegji Zgjedhor nuk ka juridiksion të shqyrtojë mosmarrëveshje që lidhen me një proçes inekzistent. Nga ana tjetër Kolegji nuk ka fuqi ligjore të bëjë ekzistent një proçes të tillë, qoftë dhe indirekt siç pretendon partia në pushtet.Pra duke pranuar gjykimin e kërkesës së zotit Idajet Beqiri kundër KQZ, Kolegji gabon sepse së pari ajo mosmarrëveshje nuk lidhet me një proçes zgjedhor legjitim dhe, së dyti indirekt merr një kompencë të Gjykatës Kushtetuese, pavarësisht se mund të mos shprehet për legjitimitetin e dekretit”,-shkruan Manjani.

Për Manjanin, rruga e vetme e ligjshme është pushimi i gjykimit të çështjes.

/DRONI.al/