nga Artan Fuga
Askush nuk ka më legjitimitet sakohë ka rënë parlamentarizmin
Ne sot kemi prej disa javësh që kemi humbur diçka të madhe. Kjo gjë është mekanizmi kryesor për modernizimin e Shqipërisë si edhe për t’a futur atë në shoqërinë e kombeve që përqafojnë shekullin e XXI.
Ka shumë pak vende që nuk e kanë. Në Europë përveç nesh të gjithë kombet e tjera e kanë.
Kemi humbur pluralizmin parlamentar!
E kemi pasur dikur aty midis dekadës të dytë dhe të tretë të shekullit të kaluar. Më parë nuk njihej. Per nja pesë dekada as bëhej fjalë. Me rënien e totalitarizmit e njohëm ashtu rakapjekthi për nja tridhjetë vjet, rrezikuam disa herë t’a shkrijmë, dhe tani ja jemi në gjendje pa këtë mekanizëm që është burim progresi social.
E cfarë më duhet se përse ka ndodhur. Qeveria thërret se ndodhi për shkak se iku opozita. Por, opozita përgjigjet se iku nga Kuvendi sepse ishte formalisht aty, si fasadë e pushtetit.
Një gjë është e sigurt. Klasa politike na ka lënë pa pluralizmin parlamentar.
Ne po bëjmë stadium të ri, por nuk kemi pluralizëm. Dështim!
Ne po rinovojmë piramidën, por nuk kemi pluralizëm. Turp!
Ne po ndërtojmë hotele me pesë yje, por nuk kemi pluralizimin. Pocaqi!
Ne bëjmë edhe festival teatrosh në kryeqytet. Por, nuk kemi pluralizëm. Estradë!
Ne dashkemi edhe të hapen negociatat në shtator, por nuk kemi pluralizëm! Rrena !
Ne jemi kthyer në kohëra parahistorike! Jemi për turp!
Edhe u digjitalizokemi, dhe japim miliona euro për televizionet private. Por, nuk kemi pluralizëm.
Ne paskemi edhe Akademi Shkencash, por nuk kemi pluralizëm! Injorantë!
Ne jemi kthyer në fis.
Vetëm kombet barbare nuk kanë pluralizëm! Ashtu qenkeshim ne!
Nuk bërtasim, nuk lemë punën, nuk përmbysim tavolinën e bukës, nuk rrimë pa gjumë, nuk fshehim fytyrën me turp sepse nuk kemi pluralizëm parlamentar. Sepse nuk e kuptojmë që pa të jemi të mbaruar!
Nuk sheh secili përgjegjësinë e tij përse e shkërmoqëm pluralizimin!
Edhe kur opozita ishte në parlament nuk kishim pluralizëm sepse kishim grupe parlamentare por pa deputetë. Kishim organizime klanike.
Tani më keq akoma në vend të pluralizmit të vërtetë na paraqesin sikur të ishim idiotë një pluralizëm prej gjasme. Individë që nuk përfaqësojnë asgjë shkojnë të zenë kolltuqe deputetësh në Kuvend. Nuk e dinë se bëjnë vepër të dënueshme nga ligja. Janë uzurpatorë. As më shumë dhe as më pak.
Edhe opozita ka përgjegjësinë e vet se përse e humbëm pluralizmin. Mos e harrojmë vitin e keq 2008.
Ne si komb kemi përgjegjësi përderisa pa pluralizëm parlamentar kujtojmë se kemi shtet, kemi platforma vetëqeverisëse, kemi nëpunës, kemi gjyqtarë, kemi ministra. Të gjithë janë të paligjshëm.
Pse?
Sepse ka rënë bartësi i sovranitetit të qytetarëve. Tani gjithçka është uzurpim.
Nuk ka legjitimitet as pedagogu që vendos notën,
as taksambledhësi që mbledh taksat,
as nëpunësi që zhytet në dokumente,
as ambasadorët,
as kryebashkiakët,
madje as ata që martohen,
që vdesin,
që marrin rrogat në fund të muajit,
kanë rënë maternitetet,
shtëpitë e fëmijës,
shkollat e vagabondave.
Zogjtë nuk kanë të drejtë të këndojnë!
Pranvera nuk ka të drejtë të vijë!
As Toka të rrotullohet.
Dielli të mos lindi në sabah!
Ne na kanë vjedhur pluralizimin!
Jemi kthyer në barbarë.
Kaq kishim fuxhut!
Tre dekada. Edhe ato tri dekada na e mbajti i huaji pluramizimin se po të ishte për ne, skizofrena sikurse jemi do ta kishim likujduar armikun duke mbetur vetëm në ishull si Robinson Kruzoi.
Na riktheni pluralizmin!
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
