SHENIM/ Një parti nga Rudina për 30 qershorin e Ramës

Krijimi i një partie të re nga Rudina Hajdari shënon edhe momentin e parë ku ajo shprehet qartë qysh se ka frekuentuar mediat dhe foltoren e Parlamentit prej vitit 2017.

Partia pritet të regjistrohet të martën kur edhe institucionet publike janë në punë, në mos Kryeministri Rama do të ndryshojë festën e pashkëve dhe do ta shpallë punë të hënën në mënyrë që mos të rrezikohen procedurat.

Them Kryeministri Rama pasi ai është përfituesi më i madh i kësaj lëvizjeje politike që erdhi nga deputetja e përkëdhelur e PD-së. Përmes kësaj partie Rama mund të zhvillojë zgjedhjet lokale të 30 qershorit, dhe kjo parti ishte e vetmja mundësi për kryeministrin të hynte në zgjedhje.

Disa media në Tiranë kanë transmetuar sot se partia u krijua fillimisht në zyrën e Ramës dhe më pas iu komunikua Rudina Hajdarit. Por skenari nuk intrigon më. Të gjithë janë të qartë se partia është inkurajuar prej kryeministrit, do të menazhohet prej tij dhe do të financohet po ashtu nga qeveria për të neutralizuar rezistencën e opozitës në vend ditën e 30 qershorit.

Parti edhe më të qarta se kjo që u bë sot nuk ia kanë dalë të përballojnë vetminë dhe largimin nga partia e madhe e aq më pak të dëmtojnë pjesën e  saj të pushtetit politik.

Parti të tilla janë krijuar që nga viti 1997 dhe asnjë prej tyre nuk ka qenë më e madhe dhe më e bujshme se sa ditën e krijimit të saj.

Më pas ato kanë ardhur duke u zbehur dhe zvogëluar pa mundur të krijojnë ngjarje vec në raste kur përdoreshin për diversionin ndaj partisë mëmë PD. Edhe kjo parti pas 30 qershorit, Rama  zor të gjejë ndonjë arsye për ta mbajtur në lojë.

Rudina Hajdari erdhi në PD pa kurrfarë vlere të identifikuar personale por më nje respekt dhe nderim të madh për të për shkak të familjes që përfaqësonte si e bija e Azem Hajdarit. Ishte një simbolikë e zgjedhur enkas nga drejtuesit e lartë të PD-së, pavarësisht se shumë shpejt ra në sy habitshëm nevoja e saj për të mësuar dhe lexuar më shumë rreth vendit të vet dhe problematikave të politikës shqiptare.

Rasti i nëpërkëmbjes së simbolikës nga vetë Hajdari tregon se rendja pas simbolikës përmes përfaqësimit familjar është e dështuar dhe nuk ka pse të kompleksojë PD në renditje të tjera përfaqësimi.  Dëmi që ajo i sjell PD në qoftë për simbolikën mund të zgjidhet thjesht që nesër. PD koopton në strukturat me te larta Kiri Hajdarin i cili është përfshirë në protestat e opozitës dhe ka qenë kundër vendimit të së motrës për të qëndruar në Parlament.

Kryeministri Rama ndërkohë ia ka dalë që të krijojë një problem në PD, edhe pse e detyron këtë parti të kthehet nga vlerat në fushë. Problemi në PD do të lidhet me raportet e saj më zgjedhjet lokale. Rama do të krijojë hapësira për njerëz që ‘konsultohen me perëndimin’ për t’ia futur partisë së tyre duke kandiduar në zgjedhje duke premtuar se do të shpërndajë vota për ta përmes skemave të manipulimit të votave dhe ti shpallë fitues në bashki të ndryshme. Rama e ka shumë më të lehtë se sa ishte në zgjedhjet e majit të vitit 1996, kur socialistët nuk ikën që në mëngjes nga votimet, por pasdite. Tani opozitën nuk do ta ketë fare.

Hapi tjetër i Ramës mund të jetë edhe një parti tjetër që vjen nga deputetët e listës së LSI-së. Do ta kishte bërë edhe më këta por brenda tyre nuk ka njeriun e duhur dhe me sa duket nuk ka pse investohet aq shumë.

Mjafton partia me Rudinën e cila pritet të pasohet edhe nga disa ish-zyrtarë të tjerë të PD, të cilët edhe për motive krejt të tjera nga Rama mund të gjenden atje.

Historia që nisi me krijimin e paligjshëm të grupit parlamentar demokrat u mbyll sot me partinë. Dalëngadalë po merret vesh se kush votoi Gramoz Rucin ditën që u bë kryetar Parlamenti. Dhe në fjalëkryqin e dhimbshëm që coi në krijimin e një partie të re si diversion ndaj PD, momenti më i rëndë është roli i Rucit, i cili me të njëjtin skenar futi në rradhët e opozitës në ’91 gjysmën e rezidentëve që kishte në listat e Sigurimit kur ishte ministër i Brendshëm i diktaturës komuniste. Droni.al

/DRONI.al/