Kryeministri Edi Rama nuk ka harruar “të qetësojë” shqiptarët lidhur me qeverinë holandeze e cila ka propozuar rikthimin e vizave për Shqipërinë. Kjo çështje ka shkaktuar jo pak debate dhe reagime.
Duke komentuar vendimin e Parlamentit të Holandës për rikthimin e vizave për Shqipërinë, Kryeministri Edi Rama tha se nuk do të ketë asnjë penalizim për qytetarët shqiptarë. Gjatë fjalës së tij në Parlament, Kryeministri e konsideroi shfaqje politike të brendshme këtë vendim të Parlamentit holandez dhe filloi të shpjegonte teknikisht gjithë procesin nëse ndodh diçka.
“KE në rast se ka një adresim nga qeveria holandeze, merr dhe shqyrton kriteret. Janë kritere teknike, jo politike. Shqiptarët përbëjnë 0.2% të personave me precendet penal apo me çështje penale në Mbrëtërinë e Holandës. Nga 240 mijë njerëz që gjenden në burgjet e atij vendi, shqiptarët nuk janë as 500.Shqiptarët janë zgjedhur nga disa parti në atë vend si një kokë turku për retorikën agresive izolacioniste në raport me zhvillimet përtej kufijve të Hollandës, në BE, dhe agresive kundër politikës evropiane të zgjerimit.
Nëse KE, hipotetikisht gjykon se kriteret objektive janë të gjitha të ndryshme nga ato që janë në fakt, atëherë KE nuk vendos, ja dërgon KiE dhe ku duhet konsensusi i të gjitha vendeve anëtare të BE për të çuar më tutje procedurën. Dhe ka një nen të veçantë, që është shumica e cilësuar e vendeve të KE në rast se ka reagim nga një vend përkatës për të vendosur VETO kundër konsensusit. Në rast se përdoret shumica e cilësuar për të pranuar këtë procedurë, atëherë i çohet Parlamentit Europian”,-sqaron Kryeministri.
Pa sulmuar nuk la as opozitën shqiptare, për të cilën tha se bëri një “festë të neveritshme” në Tiranë kur Parlamenti i Holandës kërkoi rikthimin e vizave për Shqipërinë.
“Një festë e neveritshme e cila i drejtoi të gjithë tytat e atyre topave për të hedhur fishekzjarret për të hedhur kapsollat në shtëpitë e shqiptarëve, duke u përpjekur të transformojë atë procedurë të një lufte të brendshme këtu në Tiranë e cila u katandis keq e më keq në formën e një reagimi deputetësh që refuzuan të përfaqësojnë popullin dhe t’i vënë zjarrin ardhmërisë së vendit, – u shpreh Rama.
Edhe pse nga të gjithë, Kryeministri dhe qeveria e tij jan konsideruar si fajtorët e këtij vendimi të Holandës, Rama thotë se nuk e gëlltit dot festën sipas tij në Tiranë të atyre që për shkak se janë të dominuar nga urrejtja kanë humbur logjikën.
