Deklarata e Sandër Lleshajt, por edhe e qeverisë që fajin për grabitjen e djeshme ia veshën koncesionarit kinez të Aeroportit, ka sjellë edhe reagimin e ish-deputetes demokrate, Jorida Tabaku, që e ka cilësuar si një reagim qesharak, pasi ishte po kjo qeveri që loboi që ky koncesionar të merrte në menaxhim aeroportin.
“Duket shumë qesharak reagimi i qeverisë ndaj TIA-s a thua se nuk ishte ky kryeministër dhe qeveria e drejtuar prej tij ajo që loboi fort që kompania që sot ka kontratën e koncesionarit të Rinasit t’ia merrte investitorit serioz gjermano-amerikan dhe për më tepër duke ia shtuar me dy vite kontratën duke i dhënë koncesionarit aktual pa asnjë mundim dhe 20 mln euro shtesë.”
Më tej Tabaku thotë se ishte opozita që denoncoi tri vite më parë këtë aferë korruptive.
“Ne Prill të 2016 ne e denoncuam këtë aferë korruptive që një kompani off shore-guaskë me pronar që nuk njiheshin, morën një aset strategjik kombëtar me koncesion.
Paraqitëm të dhëna që tregonin se qeveri më të përgjegjshme si ajo e Greqisë, nuk ia dha aeroportin e Athinës kompanisë që sot ka koncesionin e Rinasit. A mos vallë pazari me këtë kompani mbaroi e duan te sjellin klientin e radhës apo kanë alibinë gati për të hequr fajin nga vetja?!”
Për Tabakun vjedhja spektakolare ka vetëm një përgjegjës dhe ky është shteti dhe strukturat e tij
‘Gjithsesi, koncesionari eshte shqetësimi i fundit sepse ne rastin e vjedhjes spektakolare ka vetëm një përgjegjës; shteti dhe strukturat e tij. Policia e shtetit është njoftuar për lëvizjen e vlerave monetare si e përcakton rregullorja, policia e shtetit sot ka sport institucional të sulmojë opozitën e qytetarët por jo të kryejë detyrën. Banditët që terrorizojnë vendin dhe investitorët përfitojnë nga një qeveri që angazhohet të sulmojë qytetarët ndërsa lë të lirë bandat. Kriminelët janë të predispozuar të vjedhin dhe kryejnë akte të dhunshme kur qeveria bashkëpunon me krimin e orgnaizuar dhe e konsideron atë Partner të Përhershëm Potencial (PPP). Krimi është trimëruar se sot krimi është në pushtet!”
Ndërkohë që ish-deputetja Tabaku ka publikuar edhe udhëzimin e datës 5.03.2018, mbi përgjegjësisë që ka shteti në transportin e sasive monetare dhe sigurinë e transportit të tyre.
Shenim: Në foto pjesë nga udhëzimi i dt 05.03.2018
