Sigurinë nuk e garanton konçensionari dhe siguria nuk jepet me konçension. Kështu shprehet ish ministri i mbrojtjes dhe kryetari i Partisë Republikane, Fatmir Mediu lidhur me ngjarjen e rëndë ndodhur dje në aeroportin “Nënë Tereza”, ku në disa sekonda u grabitën rreth 10 milionë euro.
Mediu i përgjigjet edhe reagimit të kryeministrit Edi Rama, i cili fajësoi edhe koncensionarin e TIA-s, por nuk tha asnjë fjalë për përgjegjësitë që ka Policia e Shtetit në situata të tilla.
Sipas tij, kryeministri Rama ka gabuar duke ia hequr koncesionin e aeroportit të Rinasit kompanisë gjermane dhe duke ia dhënë asaj kineze.
“Sigurinë nuk e garanton konçensionari, siguria nuk jepet me konçension. Atë e garanton Shteti. Para disa kohësh, në Parlament kam ngritur shqetësimin se sektorë të ekonomisë, të lidhur me Sigurinë Kombëtare, po shiteshin nga kompani të vendeve partnere drejt vendeve që në pikpamje të sigurisë janë në kundërshtim me NATO-n, ku Ne jemi anëtarë, duke përmendur specifikisht largimin e Gjermanëve nga aeroporti dhe dhënia e tij kompanisë Kineze, nafta apo telekomunikacioni. Rama u përgjigj se; “ky është një pretendim absurd sepse ne jetojmë në një ekonomi të hapur, ku gjithësecili mund të blejë dhe të shesë”. Në Konferencën e Sigurisë në Munich dhe në mënyrë të vazhdueshme nga NATO dhe BE, është ngritur shqetësimi për influencën Ruse dhe Kineze në ekonomi, për më tepër në sektorë strategjikë. Shumë vende, në mënyrë specifike SHBA, kanë ligj të veçantë të kontrollit të blerjes nga kompanitë e huaja në sektorët strategjikë, nëse ato bien ndesh me sigurinë, atëherë nuk pranohen të kryhen edhe nëse provohen më mbrapa se cënojnë sigurinë, atëherë detyrohen që t? shesin aksionet e tyre. Ky qëndrim i Ramës ishte i papërgjegjshëm atëherë, dhe bëhet sot akoma më i papërgjegjshëm, kur ankohet për zbatimin e rregullave nga koncensionari kinez. Presidenti Meta duhet të thërrasë Këshillin e Sigurisë Kombëtare”, shprehet kreu i PR-së, Fatmir Mediu.
