Një incident që mund të mos shfaqej kurrë, ka ndodhur ditën e djeshme në zonën e Kurbneshit në Mirditë, ku ministrja e Infrastrukturës, Belinda Balluku dhe deputetja e PS, Lindita Nikolla, kishin mbërritur për një takim me banorët.
Paralel me ta, një grup banorësh ishin mbledhur për të protestuar kundër ndërtimit të një hec-i, për të cilin thonë se rrezikon të lërë pa ujë të pijshëm fshatin Lufaj.
Kur njëri prej tyre nxorri telefonin për të filmuar, u dhunua nga një prej zyrtarëve të bashkisë. Zyrtari shihet teksa i merr telefonin nga dora banorit dhe ia përplas në tokë, për të vijuar më pas me kërcënime. Nikolla ndërhyri duke u përpjekur të qetësojë situatën, por pa sukses.
Në videon e publikuar nga ‘Fax News’, dëgjohet se si zyrtari i bashkisë dhe kryebashkiaku Deda shprehen të irrituar përse po filmoheshin nga qytetari, a thua se nuk janë funksionarë publikë.
Mësohet gjithashtu se aktiviteti i Ballukut dhe Nikollës është xhiruar nga regjia e ‘Edi Rama Tv’, ndërsa gazetarët lokalë nuk janë lejuar të filmojnë, ndërsa transmetimi i saj pritet të jepet sot.
Banorët e Kurbneshit të njësisë administrative Selitë, pak ditë më parë protestuan kundër ndërtimit të HEC-ve në lumin Uraka, si e vetmja pasuri që i ka mbetur zonës së Kurbneshit.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
