Shifra të frikshme në Shkodër, 9 të vrarë në 9 muaj

Ekzekutimi i dy vëllezërve Astrit dhe Brahim Bilali e ka çuar në 9 bilancin e të vrarëve në 9 muajt e fundit

Gjithçka nisi në 18 Qershor të vitit të kaluar, kur u ekzekutua me një plumb në kokë Mehdi Kavaja, pronar i një servisi. Kjo ngjarje u pasua me një nga atentatet më të rënda të ndodhura vitet e fundit.

Në 15 Korrik u ekzekutua ish-oficeri i policisë, Boran Bërçana dhe bashkëjetuesja e tij Silvi Ndoci. Ata u qëlluan në makinë në kohën kur do të zbrisnin, ku ndodhej dhe fëmija i tyre vetëm 2 vjeç. Edhe në këtë rast, autorët dhe motivet nuk dihen.

Në 10 Gusht, Shkodra do të tronditej nga një tjetër vrasje mafioze. Viktimë mbeti Fatbardh Lici, i cili u qëllua nga një breshëri automatiku gjatë kohës që po pinte kafe në një lokal në lagjen Kiras. Ende edhe sot nuk ka të arrestuar apo një pistë konkrete ku të jetë fokusuar puna e policisë.

Prej 23 Gushtit të 2018-s, dy persona rezultojnë të zhdukur në Shkodër. Për fatin e Agron Mollajt dhe Gëzim Hysajt, dajë e nip mes tyre, nuk dihet asgjë dhe ka dyshime se ata mund të jenë vrarë.

Në 1 Shtator u vra Arjan Ferracaku, biznesmen. Ai po kalëronte pikërisht në pistën e hipizmit të familjes Bilali, bashkë me Asmer Bilalin.

Në 14 Nëntor, në tregun e lagjes Rus u vra Fatos Ferracaku, kushëri i Arjan Ferrackut. Ai u qëllua me disa plumba në kokë dhe trup, motivi ende dhe autorët ende dhe sot nuk janë zbuluar.

Në 20 Mars të këtij viti, në një tjetër ngjarje mafioze u vra Nard Polia, pronar i një bujtine në Theth. Policia arrestoi tre persona, të cilët mohuan autorësinë, ndërsa motivet ende nuk janë bërë publike.

/DRONI.al/