ERTV-ja e kryeministrit Rama është diskutuar shumë herë për mënyrën sesi po mundohet të pasqyrojë punët e qeverisë, duke u siguruar që gjithçka të jetë perfekte dhe nga ana tjetër sesi shmang raportimin profesional duke penguar dhe mediat e tjera.
Lidhur me ERTV, Përparim Spahiu, nga radhët e LSI i ka bërë një analizë këtij televizioni virtual duke komentuar rubrikat e ERTV.
Sipas Spahiut, propaganda e kësaj qeverie vazhdon pa pushim dhe me të gjitha mjetet, ndërsa ndalet edhe te intervistat e ministrave e deputetëve të PS përballë gazetarit të ERTV.
“Tek ERTV, ministra e deputetë janë kthyer në pupacë, ku japin intervistë përballë një “gazetari” të punësuar në Kryeministri (mos harrojmë që paguhen me taksat tona)”,-shkruan ish-deputeti.
REAGIMI I PLOTE
Shteti virtual i Kryeministrit!
Propaganda e kësaj qeverie vazhdon pa pushim dhe me të gjitha mjetet.
Shfaqja e fundit ishte ajo e pseudo mitingut, ku KM u kërkonte të nxirrnin celularët dhe të postonin foto të pjesëmarrjes në facebook.
Çdo hall, KM-ja kërkon ta “zgjidhë” nëpërmjet portaleve dhe rrjeteve sociale.
Kemi parë portale “Shqipëria që duam”, “Bashkëqeverisja me qytetarët”, “Infermiere për Shqipërinë”, “ERTV”, “Transparenca.al”, të gjitha për trushpëlarjen e popullit
KM zotëron të gjitha rrjetet sociale, Facebook, Instagram, Tëitter etj
Në asnjë vend të botës, (përveç Chavezit të ndjer), nuk ka Kryeministër me një televizion online, ERTV…
Tek ERTV, ministra e deputetë janë kthyer në pupacë, ku japin intervistë përballë një “gazetari” të punësuar në Kryeministri (mos harrojmë që paguhen me taksat tona)
Asnjë debat politik nuk shihet në emisionet politike, sepse e gjithë qeveria jep llogari tek ERTV, aty ku ndjehen komod dhe askush nuk i bën pyetje të vërteta.
Në ERTV sheh edicione informative ku pasqyrohen sukseset imagjinare të qeverisë.
Një tjetër rubrikë e ERTV është video-konferencat. Minatorët, naftëtarët, studentët, artistët e shumë të tjerë, qeveria nuk i pret në takim, por organizon me ta një bashkëbisedim në distancë.
Por kjo, nuk do të ndodhë me opozitën, pasi ajo ka vetëm një kusht, zgjedhje pa ty Kryeministër.
