Drogë, borxhe dhe terror tek të miturit, si u zbulua ‘bossi’ 24 vjeçar shqiptar

Pas një periudhe të gjatë hetimesh, policia e Pizas në Itali, arriti të godiste shitjen e sasive të mëdha të drogës, dhunës dhe zhvatjes, menaxhuar nga një 24 vjeçar shqiptar në bashkëpunim me dy të rinj të tjerë.

Pas muajsh hetime dhe vëzhgime, hetuesit vendas kanë zbuluar jo vetëm shitjen e lëndëve narkotike por edhe të sulmeve dhe akteve të frikësimit sidomos në mjediset e frekuentuara nga të rinj dhe shpesh edhe të mitur.

Vetëm në sajë të bashkëpunimit të viktimave të shumta, u bë e mundur të zbulohet grupi i drejtuar nga 24 vjeçari shqiptar. Ai kishte në shënjestër kryesisht nxënësit dhe shpesh të mitur me premtimet e fitimit të lehtë të parave.

Kurthi i projektuar për t’i lidhur ata në mënyrë të pandashme dhe për t’i detyruar të “punonin” për të, ishte studiuar me kujdes nga i riu shqiptar, shkruan “Il Giornale”.

Ky i fundit u dha atyre sasi të mëdha droge (hashash, marihuanë dhe kokainë), duke i mashtruar se mund t’i kthenin paratë ngadalë dhe pa ndonjë presion. Por, pikërisht këtu niste kurthi.

Për një kohë të shkurtër, të rinjtë grumbullonin borxhe të mëdha dhe nëse nuk ishin në gjendje të paguanin, shqiptari niste presionet duke i detyruar të merrnin të tjera sasi droge, kësaj here për t’i shitur tek të tjerë.

Me rrahjet dhe kërcënimet e vazhdueshme, shpesh edhe nën kërcënimin e armëve të zjarrit, shqiptari arriti të ruante një klimë terrori midis “bashkëpunëtorëve” të tij, të cilët kurrë nuk gjetën guximin për ta denoncuar.

“Muri i sekretit” u thye nga një 18-vjeçar, i cili, për shkak të borxhit ndaj 24 vjeçarit u rrah brutalisht dhe u kërcënua me armë në fund të janarit të kaluar.

I riu zbuloi gjithçka tek hetuesit. Pas kësaj, nisën dëshmitë edhe të viktimave të tjera kundër “shefit” shqiptar dhe dy bashkëpunëtorëve të tij rreth të 20-ve.

Përveç lëndëve narkotike, policia zbuloi gjithashtu edhe 9 mijë euro dhe një pistoletë.

Me akuzën për grabitje, zhvatje, trafik droge dhe armë ilegale, shqiptari dhe dy të tjerët përfunduan pas hekurave në burgun e Pizës në pritje të procesit gjyqësor.

/DRONI.al/