Familjarët e Brenton Tarrant shprehen të tronditur pas masakrës me vrasjen e 50 besimtarëve myslimanë në Zelandën e Re.
Ata kanë kërkuar falje për viktimat, ndërsa aktin e 28-vjeçarit e cilësuan të padrejtë dhe për këtë gjë ai meriton vdekjen. Mësohet se nëna e 28-vjeçarit, Sharon, është mësuese në një shkollë lokale. Ajo u largua nga policia me emergjencë nga klasa e saj direkt pas raportimit të ngjarjes.
Ajo dhe motra e Tarrantit, Lauren, janë vendosur nën mbrojtje të policisë, pa asnjë kontakt telefonik me pjesën tjetër të familjes së tyre.
Ndërkohë, sipas mediave të huaja, sektori antiterrorizëm i policisë australiane ka kryer kontrolle në dy shtëpi mëngjesin e kësaj të hëne, që kanë lidhje me agresorin.
“Objektivi i parë i këtij kontrolli është sigurimi formal i materialeve që mund të ndihmojnë policinë neozelandeze në hetimin që po zhvillojnë”, tha policia në një deklaratë për mediet.
28-vjeçari akuzohet tashmë për vrasje, pas masakrës së të premtes që i mori jetën 50 vetëve dhe plagosi edhe rreth 50 të tjerë në dy xhami të Christchurchit.
