Vendimi i Rudina Hajdarit për të mos dorëzuar mandatin e deputetit ashtu siç bëri shumica dërrmuese e deputetëve të opozitës, inspiroi vetëm kundërshtarin.
Ky është qëndrimi që mban nënkryetari i PD-së Edi Paloka, kur u pyet se si e pa vendimin e vajzës së Azem Hajdarit për të mos dorëzuar mandatin e saj si deputete. I ftuar në emisionin Zonë e Lirë, Paloka u shpreh se ai nuk do donte ta sulmonte Rudina Hajdarin, porse për të ka një këshillë të vetme.
Paloka: Rudinën e njoh pak, sepse ajo ka qenë e vogël. Jo vetëm për respekt të Azemit, sepse unë i kam miq të gjithë familjarët e Azemit. Unë nuk dua të merrem me atë. Do të thoja vetëm diçka. Në momentin kur fjalët e tua inspirojnë Taulant Ballën, duhet të fillosh të mendosh. Mbasi ajo deklaroi se nuk do të dorëzojë mandatin, doli Taulanti dhe tha u inspirova nga fjalët e saj. Në këtë moment, ti duhet të dyshosh për atë që ke bërë.
