A do të ketë ‘Pranverë Ballkanike’?

Jean-Arnault Dérens, në një artikull ka marrë në analizë gjithë situatën në të cilën ndodhen vendet e Ballkanit, përfshi këtu edhe Shqipërinë.

Duke patur parasysh situatën në Serbi, Shqipëri dhe Malin e Zi, në të cilat po zhvillohen protesta, disa kanë filluar të flasin dhe për “Pranverën e Ballkanit”, thuhet ndër të tjera në artikull.

Fraza po qarkullon gjithnjë e më shumë, por javët e ardhshme do të tregojnë nëse ajo është e vërtetë.

Duke folur dhe në kontekst historik, autori kujton të gjitha zhvillimet e ndodhura në Ballkan të cilat priten të jenë motiv për të sjellë këtë ide.

Në dhjetor, ishin studentët shqiptarë që u rebeluan kundër reformës në universitete dhe ndërhyrja e sektorit privat në botën akademike dhe që pjesërisht e përkulën qeverinë socialdemokrate të Edi Rama. Opozita konservatore ka vendosur gjithashtu të zërë rrugën. Të enjten e kaluar, deputetët e partisë kryesore opozitare madje vendosën të jepnin dorëheqjen kolektivisht.

Në Serbi, autoritarizmi i regjimit të Presidentit Vuçiq është sfiduar për tre muaj nga protestat.Protestat filluan më 8 dhjetor në Beograd dhe u përhap në të gjithë vendin. Tubimet tani zhvillohen çdo fundjavë të premten ose të shtunën.

Krahas kësaj, vazhdon kriza në raportet Serbi – Kosovë, ku kryeministri Ramush Haradinaj përjashtoi çdo diskutim për ndryshim të kufijve që do të shpinte në krijimin e shteteve etnike. “Ndarja mbi bazën e kritereve etnike nuk është një skenar realist”, tha Haradinaj, duke komentuar deklaratat e ministrit të jashtëm serb, Ivica Dacic.

Së fundi, Mali i Zi po përfshihet nga protestat për shkak të një skandali korrupsioni që përfshin DPS, partia e presidentit Milo Gjukanoviç.

Të gjitha vendet e rajonit kanë probleme të ngjashme?

Në thelb po. Të gjitha këto vende janë kandidate për integrimin evropian, por kjo perspektivë nuk ka gjasa të materializohet në vitet e ardhshme. Në të njëjtën kohë, të gjithë po përjetojnë papunësi masive, ndërsa pagat mbeten mjaft të ulëta.  Për të gjeturë një punë, shpesh është e domosdoshme që të kesh anëtarësinë e partisë në pushtet, qoftë në Shqipëri, në Serbi ose Mal të Zi.

Politika evropiane në Ballkan shumë shpesh përmblidhet në një kërkim për “stabilitet” me çdo kusht, që çon në kompromise me regjimet jodemokratike, deri në atë pikë sa shumë flasin për “stabilokraci”.

/DRONI.al/