Taulant Muka vazhdon ende të denoncojë rasteve të plagjiaturave, ku së fundmi bëri publike, sipas tij plagjiaturën e një pedagoge. Sipas tij, Pedagogja Argita Malltezi paska kopjuar një artikull dhe e ka shënuar në CV si pjesë të punës të saj.
Ndërkohë i menjëhershëm ka qënë reagimi i pedagoges, e cila ka përgënjeshtruar duke dhënë dhe metodën për të vërtetuar të kundërtën.
Ja reagimi i plotë i Pedagoges Malltezi:
Artikulli në fjalë nuk është i imi dhe nuk ia kam idenë pse emri im figuron si autor i dytë. Mund të provohet fare lehtë nga dosja që ndodhet në Ministrinë e Arsimit se ky artikull nuk figuron në listen e artikujve apo prezantimeve në konferenca që unë kam dorëzuar për marrjen e titujve shkencorë dhe as që gjendet në ndonjë nga CV-të që unë kam përdorur ndonjëherë. Në botimet e mia të dorëzuara për marrjen e titujve, përveç artikujve të botuara në revista vendase dhe ndërkombëtare janë edhe disa libra, të cilat janë pjesë e fondit të bliblotekave vendase dhe të huaja, përfshirë Library of Congress.
Nëse z.Muka do të kishte integritet kërkimor, vulën e të cilit pretendon se mban në Shqipëri, do të kishte marrë mundimin të kontaktonte me autorët të cilëve u përmend emrin për të pyetur nëse kanë shkruar një shkrim të tillë. Por mesa duket shërbimet që Muka kryen për llogari të të tjerëve janë më afër mendjes së tij sesë kërkimi shkencor pranë zemrës.
