Këshilli i Lartë i Prokurorisë ka dhënë zyrtarisht përgjigjen e saj pas shqyrtimit të kërkesës së dy partive PD dhe LSI për shkarkimin Arta Markut si prokurore e përkohshme e përgjithshme.
KLP ka shpallur moskompetencën, duke konsideruar atë si jashtë kompetencave të tij.
Sipas anëtarëve të Këshillit, shkresa ka natyrë administrative.
Kreu i Grupit Parlamentar të LSI-së, Petrit Vasili kërkoi shkarkim dhe ndjekjen penale të Markut pasi, sipas tij, kryeprokurorja përcolli kandidaturën e Bujar Sheshit si kandidaturë që plotëson kriteret për të qenë pjesë e KLP-së, pa pritur përgjigjen e verifikimit mbi integritetin e figurës së tij.
Më herët gjatë kësaj mbledhjeje KLP votoi unanimisht për Altin Dumanin si drejtues i përkohshëm në Prokurorinë e Apelit të Krimeve të Rënda.
Në një rend dite të ngjeshur, ky këshill miratoi si të komanduar dhe 6 këshilltarët që do të veprojnë pranë tij:
Arjan Muçaj, Artur Cara, Mihallaq Bleta, Mirela Kapo, Ornela Rrumbullaku dhe Vitjuna Mata.
