Ish-ministri Ylli Manjani ka komentuar atë që e quan idenë e ndryshimit, duke marrë shkas nga zhvillimet e fundit politike, ku opozita ka vendosur të djegë mandatet, dhe kur kryeministrit Edi Rama nuk do t’i mbetet zgjidhje tjetër vetëm se të hyjë në zgjedhje të parakohshme, gjë të cilën ai nuk e pranuar.
Manjani argumenton se çdo ndryshim është pozitiv dhe i mëshon fort faktit se kryeministri Edi Rama duhet të ikë, para se të qelbet me idenë se nuk vjen kush.
REAGIMI:
Mbi idenë e ndryshimit.
————
Skeptikët, mosbesuesit dhe militantët thonë “mirë iku Rama, po kush vjen? Luli është më keq”…
Nuk ka top që e luan idenë e stërprovuar se çdo ndryshim në pushtet është vetëm për mirë. Edhe kur i riu që vjen është njësoj i keq sa ai që ikën, prap është pozitiv ndryshimi.
Është pozitiv sepse pushtetari kur rri gjatë nuk kupton më se çbën. Duhet të bjerë nga pushteti e të dalë në rrugë që ta kuptojë se çka bërë.
Nga ana tjetër i riu që vjen, qoftë dhe për pak kohë ndryshon disa gjëra, të cilat krijojnë shpresë. Edhe nëse prodhon zhgënjim, prap është pozitiv ndryshimi sepse lind prap ideja për ndryshim.
Pra për ta përmbledhur:
Është më mirë që Rama të bjerë nga pushteti dhe të rikthehet prap, sesa të rrijë (të qelbet) aty me idenë se ska kush të vijë.
Në çdo rast pushteti absolut i një njeriu të vetëm nuk duhet pranuar me çdo çmim.
