Edlir Reka që e prezantoi veten si artist, pikturat e të cilit kishin marrë pjesë në shumë konkurse të huaja, nxorri të vërtetën sipas tij, duke treguar se në fakt ishte thjesht një gazetar i infiltruar i emisionit “Bypass Show”, në televizionin “Vizion Plus”.
Të gjithë menduam se këtu historia mori fund, por në fakt Rudina Magjistari ka vijuar më tej duke deklaruar se kjo e gjitha është sërish një mashtrim i tij.
Rudina, në emisionin e së cilës Edliri u prezantua fillimisht si artist dhe më pas zbuloi se nuk ishte i tillë, reagoi në Instagram.
“Këto ditë kur historitë tronditëse e të dhimbshme ia lënë radhën njëra-tjetrës, kjo duket e largët dhe e tepërt, por s’mund të rrija dot pa bërë një koment: Sepse tani e paskan radhën ca gazetarë të tjerë që e besuan sot mashtrimin e tij. E shikoni që s’është aq e thjeshtë të kuptosh menjëherë një mashtrim?”, shkroi moderatorja shqiptare.
Me këtë shkrim, kuptojmë që Rudina do të thotë se dhe pretendimet e tij të fundit nuk janë të vërteta dhe se ai nuk ishte një gazetar i infiltruar.
