Nga një superaksion i madh i policisë italiane janë sekuestruar 520 kilograme marijuanë dhe 18 kilograme kokainë.
Sipas mediave italiane, janë arrestuar 11 persona, mes tyre edhe shqiptarë. Thuhet se truri i këtij grupi trafikantësh ishte një shqiptar me banim në qytetin Prato, ndërsa një nga të arrestuarit rezulton i lidhur më mafian kalabreze Ndrangheta.
Trafiku ndërkombëtar i goditur bëhej me anë të autobusëve të linjës që manaxhonte një shoqëri milaneze dhe që udhëtonte në itinerarin Holandë-Belgjikë-Milano.
Droga, sidomos kokaina, fshihej në një hapësirë poshtë shkallëve të brendshme të autobusit me dy kate dhe që ishte e aksesueshme vetëm përmes procedurave të ndërlikuara elektronike.
Droga transportohej bashkë me pasagjerët e rregullt të linjës. Hetimet, të koordinuara nga zëvendësprokurori i Firences, Giulio Monferini, kanë individualizuar si kapo të organizatës një shqiptar me banim në Prato, të cilit i referoheshin të gjithë bashkëpunëtorët e tjerë të organizatës.
Në hetimin me emrin e koduar ‘Bus Lijnen’ (Linja autobusi, në gjuhën flamande) janë dokumentuar 17 raste transportimi të drogës (që vinte nga Amerika e Jugut) nga Holanda në Itali.
