Shuplaka e KLSH: Ministria e Arsimit shkeli ligjin e Arsimit të Lartë

Kontrolli i Lartë i Shtetit zhvilloi inspektime në Ministrinë e Arsimit dhe në 8 Universitete. Kwto inspektime filluan një muaj para se studentët të nisnin protestat për uljen e tarifave dhe shfuqizimin e ligjit të arsimit të lartë.

Hetimi ka nisur në shtator për tu mbyllur në 11 nëntor.

Në raportin prej 96 faqesh, konstatohet se reforma nuk është zbatuar.

“MAS vijon të veprojë kundra ligjit përmes centralizimit të panevojshëm që bën nga njëra anë me akte të panevojshme nënligjore, funksioneve që në fakt ligji ua njeh IAL-ve dhe nga ana tjetër, duke mos bërë funksionale strukturat përkatëse për financimin dhe rregullimin e arsimit të lartë”.

Madje KLSH konstaton se dhe Bordet e Administrimit ku MAS ka shumicën, nuk kanë funksionuar.

“Anëtarët e Ministrisë në Bordet e Administrimit, ku përfaqësojnë shumicën vendimmarrëse nuk i kanë kryer me përgjegjësi detyrat, duke mos garantuar qëndrueshmërinë financiare autonome të këtyre institucioneve. Madje duke marrë vendime financiare pa analiza kostoje për tarifimin e shërbimeve që ofrojnë”.

Inspektorët nënvizojnë se Universitetet janë pasivë për sa i përket kërkimit shkencor.

Sa u përket tarifave, KLSH ka zhvilluar një verifikim të të dhëna në çdo Universitet.

Teksa shtohet se AKFAL është institucioni i ngarkuar për financimin, por që nuk është ngritur.

Duke shtuar se Universitetet nuk marrin grandin e duhur nga qeveria shtohen dhe pikat e gjetura me shkelje.

“IAL financohen më pak se kërkesa e tyre nga granti i buxhetit për mësimdhënien. Tarifat për studentët nuk janë vendosur në bazë të analizës së kostos. Tarifat e shërbimit janë miratuar nga bordet jo mbi bazë të analizave. IAL tarifojnë studentët për vërtetimin e studentit”.

Në analizën e të dhënave shihet si shqetësim numri i lartë i personelit krahasuar më stafin pedagogjik.

Madje shpenzimet për ta shkojnë në 25 për qind në UT, 41 për qind në Durrës dhe 27 për qind në Vlorë.

/DRONI.al/