Ministri i Brendshëm Sandër Lleshaj me anë të një postimi në rrjetet sociale, ka rikujtuar dhe njëherë qytetarët për të mos neglizhuar rifreskimin e kartave të identitetit pasi ato skadojnë.
Lleshaj shpjegon rëndësinë që ka ky proces duke treguar më tej mënyrën sesi mund të informohen për ndryshimet.
Deri në datën e zgjedhjeve, shqiptarët kanë afro 6 muaj kohë për t’u pajisur me letërnjoftimet e reja, pasi në të kundërt nuk do të munden të votojnë.
POSTIMI I PLOTË
Qytetarët duhet të informohen për datën e skadimit të dokumenteve, pasi me të lidhet fati i shumë shërbimeve të rëndësishme.
Zyrat e Gjendjes Civile janë në dispozicion për të informuar dhe ndihmuar qytetarët.
Neglizhenca për të kryer detyrimin e pajisjes me dokumentet bazë të identifikimit mund të krijojë probleme për marrjen e shumë shërbimeve të rëndësishme, që nga udhëtimet jashtë vendit e të tjera.
Institucionet do të kushtëzojnë dhënien e shërbimeve, për personat që janë në muajt e fundit të vlefshmërisë së dokumenteve, me paraqitjen e vërtetimeve mbi aplikimin për dokumentin e ri.
Ndaj lutem, verifikoni dokumentet e identitetit dhe mos harroni t’i bëni shërbimin e duhur vetes!
