Ajo që u konsiderua qysh ditën e parë të krijimit si “superministria” e Damian Gjiknurit, tashmë pritet të drejtohet nga Belinda Balluku, zonja e cila që prej ardhjes së PS në pushtet ka drejtuar agjensitë shtetërore që menaxhojnë trafikun ajror. Që në fakt janë të lakmueshme për shkak të vetëfinancimit dhe fondeve të mëdha duke u shndërruar shpeshherë dhe në pika të marrëveshjeve postelektorale mes partive që bashkëqeverisin.
Si një nga emërimet e para të qeverisë në vitin 2013, zonja Balluku ka qenë kohët e fundit në qendër të akuzave për keqpërdorimin e fondeve të Albcontroll-it. Institucioni i drejtuar prej saj ka paguar plot 66 milionë lekë për të trajnuar dy anëtarë të stafit. TPZ publikoi pak kohë më parë dhe dokumentat përkatëse, duke hedhur dritë mbi një seri tenderash me që drejtuesja e kompanisë i jepte me vlerën 100% vetëm një ofertuesi.
Ndërkohë sipas PD, 70% e procedurave të zhvilluara nga Albcontroll 5 vitet e fundit kanë qenë me prokurim të drejtëpërdrejtë, ndërsa vlera ka kapur shifrën e 20 miliardë lekeve.
Por këto akuza duket se nuk e kanë shqetësuar zonjën Balluku, e cila si drejtuese institucioni, me tender te hapur apo me prokurim të drejtëpërdrejtë i ka organizuar stafit një super mbrëmje për festat e fundvitit.
Opinion.al ka mundur të sigurojë disa foto dhe një video të shkurtër ku në një ambient të dekoruar me kujdes,me balerina të veshura si në karnavale, stafi i Albcontroll ka festuar deri në orët e para të mëngjesit në të vetmin hotel me 5 yje në Tiranë, tek “Plaza Hotel”. Sigurisht që festa është organizuar rreth një javë më parë, kur zonja Balluku nuk ishte zgjedhur ende si ministrja e re e Infrastrukturës dhe Energjitikës.
Ndoshta ministrja e re do të ketë mënyrë dhe stil tjetër drejtimi në postin e saj të ri. Duke mbajtur në vëmendje që këtë herë, Edi Rama nuk do ta rikthejë më në PS, nëse do të bëjë gafën e famshme kur ishte sekretare për marrdhëniet me publikun e selisë rozë. Dhe pas vizitës së ish shefit të atëhershëm të opozitës në Kosovë, në njoftim shkroi: “Edi Rama u takua me kryetarin e AAK Rramush Haradinaj”…. i cili në fakt gjatë vizitës së Rames në Kosovë ndodhej për gjykim në Hagë. Asokohe ajo u largua nga vëmendja dhe PS, për t’u rikthyer pas zgjedhjeve të 2013.
Ndërsa duket qartas se shefi i qeverisë ka besim se Belinda Balluku, bën pjesë tek kategoria e njerëzve që mësojnë nga gabimet. Dhe Edi Rama ka treguar se di të falë e të rikthejë të preferuarit e tij në pushtet.
/Opinion.al
*Foto dhe video nga festa me balerina e Albcontroll në “Plaza Hotel”
