Vendimi për padinë mes kreut demokrat Lulzim Basha dhe deputetit Tauland Balla pritet të jepet në janar të vitit që vjen. Gjykata e Tiranës i ka dhënë fund shqyrtimit gjyqësor, duke administruar provat e paraqitura nga palët.
Gjykata e Tiranës i ka dhënë fund shqyrtimit të padisë mes kreut të Partisë Demokratike Lulzim Basha dhe deputetit socialist Taulant Balla.
Gjyqtari i çështjes, Gert Hoxha, në seancën e kësaj radhe vendosi adminstrimin e provave të paraqitura nga të dyja palët, kryesisht CD me deklarimet e kreut demokrat dhe ka ftuar palët për të paraqitur konkluzionet përfundimtare.
Seanca e radhës u la për në 14 janar, ku palët do të paraqesin qëndrimet përfundimtare dhe më pas gjykata do të japë verdiktin.
Por nëse hyn në fuqi amnistia e propozuar nga qeveria mund të bëjë që edhe kjo çështje të pushohet.
Padia është bërë nga deputeti Balla, i cili akuzon kreun demokrat për shpifje të bërë botërisht dhe kërkon dënimin e tij.
Padia ka të bëjë me deklaratat e Bashës në lidhje me sasinë e 3.5 milion eurove të gjetura në portin e Durrësit, për të cilat kreu demokrat akuzoi se kanë lidhje me deputetin Balla.
