Përveç studentëve në Tiranë, janë dhe studentët në rrethe të cilët kanë dalë në protesta ditën e sotme.
FaxWeb shkruan se studentët në Elbasan nuk janë lejuar të zhvillojnë protestën në ambjentet e universitetit. Studentët shprehen se ndalimi i tyre është me urdhër nga lart.
Sipas tyre, roja u ka thënë që të mos protestojnë në universitet, pasi kështu ka marrë urdhër nga lart, që nënkupton se urdhëri është marrë nga Ministria e Arsimit.
Ndërkohë studentët kanë vijuar të protestojnë në ambjentet rrethuese të Universitetit.
Nga ana tjetër, studentët në Gjirokastër, të cilët janë në ditën e dytë të protestës, shprehen se kanë hasur vështirësi në organizimin.
Së pari ishte policia ajo që i kishte paralajmëruar se protesta është e paligjshme për shkak se nuk ishte marrë leje dhe mund të përfundonin në komisariat.
Madje ditën e sotme, studentët kanë pasur dhe ndërhyrjen e FRESH në Gjirokastër të cilët me anë të mesazheve të ndryshme janë përpjekur të pengojnë pjesëmarrjen e studentëve në këtë protestë për kërkesat e tyre legjitime.
Ndërkohë, studentët kanë sqaruar dhe shoqërimin në komisariat, për të cilën thonë se policia i ka njoftuar se nëse bllokojnë rrugën do të dërgohen në polici.
