Bardhok Pllanaj, i arrestuar për pastrim parash, ka përfunduar në reanimacionin e Spitalit Rajonal të Shkodrës për shkak të problemeve me zemrën.
Pllanaj, 44 vjeç, ndodhet në paraburgim pas arrestimit dy ditë më parë.
Arrestimi i tij ka ardhur për shkak se ka ndërtuar një pallat me 10 kate pa leje me vlerë 2 milionë euro, që dyshohet se është financuar nga të ardhurat e aktivitetit kriminal.
Bardhok Planaj biznesmeni 44 vjeç i arrestuar në Shkodër, tronditi politikën 4 vite më parë, kur u fsheh në makinën e ish-deputetit Mark Frroku gjatë kohës që ka qenë në kërkim, si person i dyshuar si organizator i një rrjeti të trafikut ndërkombëtar të drogës.
Ai ishte shpallur person në kërkim pak kohë pas aksionit të njohur si “Operacioni i Vilunit” në zonën e Shkodrës. Planaj i shpëtoi arrestit të policisë mesnatën e datave 1 dhe 2 tetor 2014, pasi rezultoi i fshehur në makinën e ish-deputetit Mark Frroku.
Në procesverbalin e Policisë, thuhej se grupi i operacioneve speciale në Policinë e Shtetit, me autorizim të Prokurorisë për Krime të Rënda, po vëzhgonte prej kohësh të dyshuarin Planaj. Sipas raportit të dorëzuar nga agjentët e vëzhgimit, thuhet se Pllanaj gjatë gjithë ditës së 1 tetorit 2014 ishte nën vëzhgim, ku përshkruhen me detaje lëvizjet e tij, makinat që ka ndërruar si dhe lokalet që ka frekuentuar.
