Disa prej degëve të Partisë Demokratike, në qarqet e mëdha të vendit kanë përfunduar këtë fundjavë procesin e zgjedhjeve për kryetarët e partisë.
Këta janë kryetarët e rinj të PD në rrethe:
Elbasan- Ish-kryetari i qarkut,Eugen Isai është rizgjedhur në krye të degës së PD në këtë qytet. Ai fitoi me 378 vota përballë kandidatit tjetër në garë Zamir Muzhaqi, i cili mori 88 vota.
Berat- U riamandatua kryetari aktual Gazmend Azizi, i cili fitoi me 172 vota kundrejt 108 votave që mori kandidati tjetër Shkëlqim Hysi.
Durrës- Fitues ka dalë ish-ministri demokrat, Ferdinand Xhaferaj me 222 vota kundrejt 130 votave që mori kandidati Sokol Kapidani.
Fier- Deputeti i PD Luan Baçi, është rizgjedhur në krye të degës në këtë qytet. Baçi ka deklaruar se do të vijojë të drejtojë degën e Fierit, pavarësisht faktit se mban mandatin e deputetit.
Kamëz – Një mandat të ri në krye të PD-së ka marrë edhe kryebashkiaku Xhelal Mziu. Ai u rizgjodh për një mandat të ri 4-vjeçar në krye të PD-së së Kamzës.
Vlorë – Genc Deromemaj është kryetari i ri. Ai arriti të siguronte 12 vota më shumë se sa kandidati tjetër, Gjergj Nika.
Shkodër – Xhevdet Amulli, i cili mori 243 vota, vetëm 2 më shumë se sa kryetari aktual Ramiz Çobaj.
Lezhë- Kryetari aktual i PD-së Paulin Marku nuk arriti të rikonfirmohej, pasi kandidati tjetër në garë, Zef Gjoka siguroi 88 vota më shumë.
Dibër- Dega e PD-së do të drejtohet nga Naim Gazidede.
Pogradec-Dega e Partisë Demokratike të Pogradecit, ka zgjedhur në krye të saj të Seit Myftarin.
Partia Demokratike me 15 dhjetor mbledh Kuvendin Kombëtar. Nga kjo mbledhje do të dalë Këshilli i ri kombëtar i cili do të zgjedhë kryesinë e PD-së, nënkryetarët e partisë, sekretarin e përgjithshëm, nënkryetarët dhe sekretariatin.
