Kancelarja gjermane Angela Merkel erdhi sërish me vonesë në samitin e G20 në Argjentinë. Kjo pasi avioni i saj pati një defekt pas largimit nga Berlini.
Zyra e saj thotë se zonja Merkel dhe delegatët u ulën një vend të sigurt, por të paplanifikuar. Ata bënë ulje të menjëhershme në Këln, pasi Airbus pati një problem teknik.
Aeroplani u kthye mbrapa ndërsa fluturonte mbi Holandën, thonë mediat gjermane. Merkel udhëtoi përmes Spanjës në Buenos Aires po këtë të premte.
Piloti i njoftoi udhëtarët se kishte vendosur të kthehej pas “mosfunksionimit të disa sistemeve elektronike”. Problemi qëndronte me sistemin e komunikimit të aeroplanit dhe ekuipazhi duhej të përdorte një telefon satelitor për të kontaktuar kontrollorët e trafikut ajror, shkruhet në faqen e Spiegel.
Një problem i shtuar për avionin ishte pista e aeroportit të Këlnit e cila nuk ishte e disponueshme, shtoi Spiegel.
Delegacioni gjerman u mbajt në aeroplan pas uljes, derisa erdhi një autobus që i transportoi në një hotel në Bon.
Avioni i qeverisë Airbus A340-300 mban emrin e Konrad Adenauer, emrin e Kancelarit të parë të Gjermanisë së pasluftës.
Për ministrin e financave Olaf Scholz, problemet teknike të Konrad Adenauer nuk janë asgjë e re. Në tetor ai ishte në një udhëtim në Indonezi, kur aeroplani shfaqi probleme me kabllo elektrike gjatë një takimi vjetor të Fondit Monetar Ndërkombëtar (FMN).
